उकाडयात आगीने 'ठाणे' धगधगले - तीन ठिकाणी आगडोंब

 

ठाणे (Thane Fire): कडाक्याचा उन्हाळा सुरू असताना बुधवारी आगीच्या घटनांनी 'ठाणे' अक्षरशः धगधगले. मंगळवारी रात्री गायमुख जकात नाका येथील डम्पिंग ग्राउंडला लागलेल्या आगीने घोडबंदर भागात धुराचे लोट बुधवारी दुपारपर्यत दिसत होते. मंगळवारी रात्री लागलेली ही आग तब्बल १२ ते १३ तासानंतर अग्निशमन दलाने आटोक्यात आणली.

 

घोडबंदर रोड परिसरातील गायमुख जकात नाका येथे कचरा व्यवस्थापनासाठी डम्पिंग ग्राउंड उभारले आहे. मंगळवारी रात्री येथे कचऱ्याला आग लागली. बाळकुम अग्निशमन केंद्राने तात्काळ घटनास्थळी धाव घेतली. अग्निशमन दलाचे जवान १ फायर वाहन व पाणीपुरवठा विभागाच्या सात वॉटर टँकरच्या मदतीने आग आटोक्यात आणली. आपत्ती व्यवस्थापन विभागामार्फत एक जेसीबी मशीन व एक पोकलेन मशीनने येथील कचऱ्यातून मार्ग काढण्यात आला. त्यानंतर या आगीवर नियंत्रण मिळवण्यात आले. दरम्यान, बुधवारी सकाळच्या सुमारास माजिवडा येथील लोढा क्राऊनमधील इमारत क्रमांक तीन या २१ मजली इमारतीतील १४ व्या मजल्यावरील घरात आग लागली. यात फर्निचर आणि वायरींग जळुन खाक झाली. तर, दुपारी ३ वाजण्याच्या सुमारास कौसा, मुंब्रा येथील लव्ह सर्कल जवळील १२ मजली लँड मार्क इमारतीच्या तळमजल्यावरील मीटर बॉक्सला आग लागली.घटनास्थळी टोरंट पॉवर कंपनीचे कर्मचारी व अग्निशमन दलाचे जवान रेस्क्यू वाहनासह उपस्थित राहुन आगीवर नियंत्रण मिळवले.