दीदींची हिंदूद्वेष्टी ‘गंदगी’

 

मोहम्मद युनूस यांनी बांगलादेशची सूत्रे स्वीकारल्यानंतर तेथील हिंदूंच्या जीविताला आणि मालमत्तेला धोका निर्माण झाला. हजारो हिंदूंची निर्घृणपणे कत्तल करण्यात आली, घरे जाळण्यात आली, दुकाने भस्मसात झाली. बांगलादेशातील हिंदू आजही जीव मुठीत धरून कसाबसा श्वास घेतोय. मुस्लीमबहुल बांगलादेशातील हे विदारक वास्तव. पण, हिंदूबहुल असलेल्या प. बंगालमध्ये आता हिंदू बांधवच सुरक्षित नाही, अशी भीषण परिस्थिती. एकट्या मार्च महिन्यात बंगालमध्ये हिंदूंवरील आठ हल्ले नोंदवण्यात आले. मुर्शिदाबादमध्ये काही समाजकंटकांनी हिंदूंची दुकाने आणि मालमत्तांची नासधूस केली आणि त्यांना आगीच्या भक्ष्यस्थानी टाकले. एवढेच नाही, तर या प्रकरणाचा व्हिडिओ ‘ट्विट’ करत, हिंदूंना लक्ष्य करणारे ममता बॅनर्जी यांच्याच तृणमूल काँग्रेसचे कार्यकर्ते असल्याचा आरोपही राज्यातील भाजपचे विरोधी पक्षनेते सुवेंदू अधिकारी यांनी केला. हिंदूंची घरे, दुकानेच नव्हे, तर हिंदूंची मंदिरे, देवीदेवताही बंगालमध्ये सुरक्षित नाहीत. दि. 7 मार्च रोजी शेख इंदू नामक एका धर्मांधाने शीतलादेवीच्या मूर्तीची तोडफोड केली आणि मूर्तीलाच चक्क आग लावून टाकली. स्थानिकांनी त्याला पकडून पोलिसांच्या ताब्यातही दिले. पण, पोलिसांनी ही व्यक्ती माथेफिरू आणि मानसिकदृष्ट्या अस्थिर असल्याचे कारण देत, प्रकरण दाबण्याचाच प्रयत्न केला. अशाच हिंदू देवीदेवतांच्या मूर्तींना बशीरहाट, नंदीग्राममध्ये मार्च महिन्यात लक्ष्य करण्यात आले. पण, या सगळ्या प्रकरणी पोलिसांची कारवाई आणि सरकारची भूमिका ही संशयास्पद अशीच. याचाच अर्थ, हिंदूंवरील हल्ल्यांना ममतादीदींच्या सरकारचे मूकसमर्थन असल्याचेच दिसून येते. पण, तरीही ममता बॅनर्जींना बंगालमध्ये हिंदू असुरक्षित आहेत, असे कदापि वाटत नाही. त्यांच्या दृष्टीने हा सगळा ‘बाम-राम’ अर्थात कम्युनिस्ट आणि भाजपचा अजेंडा. त्यामुळे ज्या ज्या हिंदूंवर, त्यांच्या घरांवर, दुकानांवर हल्ले होतात, त्यांना सरसकट संघ-भाजपचे ठरवून ममतादीदी मूग गिळून गप्प बसल्या आहेत. आपण बांगलादेशातील हिंदूंच्या सर्वांगीण स्थितीबाबत वारंवार चिंता व्यक्त करतो. पण, आपल्याच देशातील बंगालमध्ये ‘हिंदू खतरे में हैं’ अशी भयावह स्थिती. त्यामुळे बंगाली हिंदूंनी आता रस्त्यावर आणि नंतर मतपेटीतून दीदींचे जुलमी शासन उलथवण्याशिवाय हिंदू सुरक्षित होणे नाही!