मुलींच्या सुरक्षेसाठी समाजाने सजग होणे गरजेचे : विधानपरिषद उपसभापती डॉ. नीलम गोऱ्हे

 

 

पुणे : मुलींच्या सुरक्षेसाठी समाजाने सजग होणे गरजेचे असून बारामती येथे अल्पवयीन मुलीच्या आत्महत्या प्रकरणातील आरोपीला कठोरात कठोर शिक्षा झाली पाहिजे, असे आवाहन विधानपरिषद उपसभापती डॉ. नीलम गोऱ्हे यांनी शुक्रवार, ११ एप्रिल रोजी केले.

 

डॉ. नीलम गोऱ्हे म्हणाल्या की, "पुणे जिल्ह्यातील बारामती तालुक्यातील कोऱ्हाळे खुर्द गावातील एका तरुणाकडून सातत्याने होणारा मानसिक त्रास शाळकरी मुलीला सहन न झाल्यामुळे तिने आत्महत्या केली. हे वृत्त समोर आल्यानंतर अत्यंत खेद वाटतो. आजही आपल्या समाजात अशा घटनांमुळे अल्पवयीन मुलींना सुरक्षित वातावरणात जगता येत नसून ही बाब अतिशय गंभीर आहे. अशा प्रकारच्या घटना टाळण्यासाठी प्रत्येकाने जबाबदारीची भूमिका बजावली पाहिजे," असे आवाहन त्यांनी केले.

 

 

"मुलींना कोणताही त्रास, छेडछाड अथवा धमकी दिली जात असेल, तर त्यांनी कोणतीही भीती न बाळगता ११२ या पोलीस हेल्पलाइन क्रमांकावर तातडीने संपर्क साधावा. तसेच स्त्री आधार केंद्र यासारख्या महिला सहायता संस्थांकडे संपर्क साधून मदत घेता येईल. मुलींच्या वागण्यात कोणतेही भावनिक वा मानसिक बदल जाणवले तर त्याकडे पालकांनी दुर्लक्ष न करता त्यांच्याशी संवाद साधावा. सुरक्षितता, भावनिक आधार आणि समजूतदारपणाची गरज असलेल्या अशा प्रसंगांमध्ये पालकांची भूमिका अत्यंत महत्त्वाची ठरते," असेही डॉ. गोऱ्हे म्हणाल्या.

 

"शाळा आणि महाविद्यालयांमध्ये लैंगिक शिक्षण, स्वसंरक्षण, कायदेशीर हक्क आणि मदत केंद्रांची माहिती देणारे कार्यक्रम नियमितपणे राबवावे. समाजानेही अशा घटना रोखण्यासाठी एकत्र येऊन सतर्कता बाळगली पाहिजे. आपल्या परिसरात कोणत्याही संशयास्पद हालचाली जाणवल्यास तात्काळ स्थानिक पोलिसांना माहिती द्यावी. या घटनेतील आरोपीला कठोर शिक्षा झालीच पाहिजे. समाजात अशा अमानुष वागणुकीला थारा नाही. अल्पवयीन मुलींना सुरक्षित, सन्मानजनक आणि निर्भय आयुष्य मिळावं ही आपली जबाबदारी आहे," असेही डॉ. नीलम गोऱ्हे म्हणाल्या.