कालचा गोंधळ बरा होता!

 

गाढवापुढे वाचली गीता, कालचा गोंधळ बरा होता,’ अशी सध्या उबाठा गटाची स्थिती. शिवसेनेत उभी फूट पडल्यानंतर बुडत्या पक्षाला आधार देण्याची संधी उद्धव ठाकरे यांच्या पाठोपाठ आदित्य ठाकरेंकडे (युवा नेतृत्व म्हणून) होती. पण, त्यांना ना कार्यकर्ते सांभाळता आले, ना पक्ष. तरीदेखील 2029 साली आदित्य मुख्यमंत्री होतील, असे भाकित माजी खासदार चंद्रकांत खैरे यांनी वर्तवले. बहुधा सनसनाटी विधान करून माध्यमांचे ध्यान स्वतःकडे वळवण्याचा त्यांचा प्रयत्न असावा. पण, तो फुसका बार निघाला. त्यांच्या विधानाची ना माध्यमांत चर्चा झाली, ना पक्षात. कारण, युवासेनाप्रमुख, आमदार, मंत्री अशी एकामागोमाग एक महत्त्वाची पदे उपभोगल्यानंतरही ज्यांना पक्षावर मांड ठोकता आली नाही, ते आदित्य ठाकरे इतका मोठा पराक्रम करू शकतील, याची खात्री कुणालाच नाही. मुळात अखंड शिवसेनेत उद्धव ठाकरेंनंतर आदित्य यांच्या शब्दाला मान होता. बाळासाहेबांचा नातू म्हणून त्यांना राज्यभरातील शिवसैनिकांचे प्रेमही मिळायचे. अशावेळी शिलेदारांनी साथ सोडल्यानंतर, युवराज म्हणून पक्षाला आधार देण्याची संधी त्यांच्याकडे होती. शिवसेनेतील फुटीनंतर प्रत्येक विधानसभेत जाऊन शिवसैनिकांना चेतवणे, त्यांना धीर देण्याचे काम आदित्य यांनी करणे अपेक्षित होते. पण, दोन-चार मोठे मतदारसंघ फिरून त्यांची ‘वात विझलेली तोफ’ थंडावली. हा झाला पक्षांतर्गत राजकारणाचा विषय. पण, महाविकास आघाडीच्या काळात कॅबिनेट मंत्री म्हणून यांनी केलेले एकतरी काम समाजहिताचे असावे, पण नाही! आधीच्या प्रकल्पांना स्थगिती देण्यापलीकडे यांच्या पेनातील शाईचा वापर कधी लोककल्याणासाठी झाला नाही. मुंबईतील वाहतुककोंडी सोडवण्याच्या दृष्टीने अतिशय महत्त्वपूर्ण असलेल्या ‘मेट्रो-3’ प्रकल्पात यांनी खो घातला. तो कांजूरमार्गला हलवण्याचा निर्णय त्यांच्या मुख्यमंत्री वडिलांनी घेतला. पण, कांजुरला कारशेड नेणे संयुक्तिक नसल्याने, पुन्हा हा प्रकल्प आरे वसाहतीत सुरू करण्यात आला. या विलंबामुळे तब्बल दहा हजार कोटींचा फटका बसला. केवळ पुत्रहट्टापोटी सर्वसामान्यांचा करातून जमा झालेल्या पैशांचा चुराडा करण्यात आला. अशा कर्तृत्वशून्य माणसाला मुख्यमंत्रिपदावर बसवण्याची स्वप्ने चंद्रकांत खैरे पाहत असतील, तर महाराष्ट्रातील जनता नाठाळाच्या माथी काठी हाणल्याशिवाय राहणार नाहीत!