'म्हाडा' कोकण मंडळातर्फे राखीव भूखंडाची विक्री

 

 

 

मुंबई: ( MHADA Konkan Mandal ) ‘म्हाडा’च्या ‘कोकण व गृहनिर्माण क्षेत्रविकास मंडळा’तर्फे मौजे शिरढोण व मौजे खोणी (ता. कल्याण जि. ठाणे) येथे ‘प्रधानमंत्री आवास योजना’ (शहरी) अंतर्गत उभारण्यात येत असलेल्या गृहनिर्माण प्रकल्पांतर्गत शाळा व मल्टिस्पेशालिटी हॉस्पिटलसाठी आरक्षित भूखंडांच्या विक्रीसाठी मंडळातर्फे निविदा प्रक्रिया सुरू करण्यात आली आहे.

 

या प्रक्रियेत इच्छुक व्यक्ती, संस्था (कंपनी), सार्वजनिक धर्मादाय ट्रस्ट, नोंदणीकृत सोसायटी, शिक्षण संस्था, आरोग्य संस्था, भागीदारी फर्म, ट्रस्ट, संयुक्त उपक्रम, इच्छुक संस्था, विकासक आदी सहभाग घेऊ शकतात. या भूखंड खरेदीसाठी मंगळवार, दि. १८ मार्च २०२५ रोजीपर्यंत ‘म्हाडा’च्या संकेतस्थळावर जाऊन निविदा प्रक्रियेत आपला सहभाग नोंदवावा, असे आवाहन कोकण मंडळाच्या मुख्य अधिकारी रेवती गायकर यांनी केले आहे. मंडळातर्फे सर्व्हे क्र. ८६,९५ मौजे शिरढोण (ता. कल्याण, जि. ठाणे) येथे उभारण्यात येत असलेल्या गृहप्रकल्पाचे अत्याधुनिक पद्धतीने नियोजन करण्यात आले आहे. येथे आदर्श गृहनिर्माण वसाहत निर्माण करण्याचा मंडळाचा मानस आहे. या गृहनिर्माण प्रकल्पामध्ये ‘प्रधानमंत्री आवास योजने’अंतर्गत अत्यल्प उत्पन्न गटासाठी ७ हजार, १४१ सदनिका व ‘म्हाडा’ योजनेअंतर्गत अल्प उत्पन्न गटासाठी ५२८ सदनिका उभारण्यात आल्या आहेत.

 

यापैकी १ हजार, ९०५ सदनिकांना भोगवटा प्रमाणपत्र प्राप्त झाले आहे व उर्वरित सदनिकांकरिता भोगवटा प्रमाणपत्र प्राप्त करवून घेण्याची कार्यवाही सुरू आहे. या ठिकाणी ‘म्हाडा’ योजनेअंतर्गत नवीन अल्प उत्पन्न गटातील ११ हजार, २३ सदनिकांना मंजुरी मिळाली आहे. या अभिन्यासात मल्टिस्पेशालिटी हॉस्पिटलसाठी ७६५.६४ चौरस मीटर व ५९६.८७ चौरस मीटर क्षेत्रफळ असलेले दोन भूखंड आहेत. तर शाळा व खेळाच्या मैदानासाठी ३ हजार, ०३३.२५ चौरस मीटर व २ हजार, ७६८.६७ चौरस मीटर क्षेत्रफळाचे दोन भूखंड आरक्षित आहेत. या प्रकल्पासाठी पाणी व वीजपुरवठा उपलब्ध आहे. प्रस्तावित विरार-अलिबाग मल्टिमॉडल कॉरिडोर हा प्रकल्पाच्या मध्यातून जातो. त्यामुळे वाहतूक सुविधांचा मोठा लाभ होणार आहे.

 

या व्यतिरिक्त या प्रकल्पांतर्गत अतिरिक्त सुविधांचे नियोजन करण्यात आले आहे, जसे बहुउद्देशीय क्लबहाऊस. ज्यामध्ये कम्युनिटी हॉल, व्यायामशाळा आदी सुविधा पुरविल्या जाणार आहेत. दुकानी गाळे, गार्डन अशा विविध सुविधांचा अंतर्भाव असणार आहे. या सर्व बाबींचा विचार करता शाळा व हॉस्पिटल प्रयोजनार्थ खुला भूखंड खरेदीदारांना उपयुक्त ठरणार आहे.

 

 

सर्व्हे क्र. १६२, मौजे खोणी (ता. कल्याण) येथे ‘म्हाडा’मार्फत ‘प्रधानमंत्री आवास योजना’ (शहरी) अंतर्गत अत्यल्प उत्पन्न गटासाठी ५ हजार, ६० सदनिकांचे बांधकाम पूर्ण झाले आहे. ४ हजार, ४८ सदनिकांना भोगवटा प्रमाणपत्र प्राप्त झाले आहे. सद्यस्थितीत सदनिकांची ताबा देण्याची कार्यवाही सुरू आहे. २ हजार, ११४ अल्प उत्पन्न गट योजनेतील सदनिकांचे बांधकाम प्रगतीपथावर आहे. हा प्रकल्प कटई बदलापूर पाईपलाईनच्या लगत असून तेथे पाणी, वीजपुरवठा उपलब्ध आहे. या प्रकल्पात कम्युनिटी हॉल, व्यायामशाळा, ६० दुकानी गाळे, ऑफिस कार्यालय, हॉस्पिटल, गार्डन आदी सुविधा ‘म्हाडा’ उपलब्ध करून देणार आहे. या प्रकल्पाच्या भू-अभिन्यासामध्ये शाळा व शाळा लगतचे मैदान सर्व एकूण २ हजार, ४६४.६० चौमी क्षेत्रफळाचे भूखंड उपलब्ध आहे. या भू-अभिन्यासामध्ये एकूण ७ हजार, १७४ सदनिका आहेत. शाळेसाठी विद्यार्थी उपलब्ध होण्यास मदत होणार आहे. या सर्व बाबींचा विचार करता शाळेसाठी उपयुक्त अशा जागेसाठी इच्छुक अर्जदारांनी निविदा प्रक्रियेत सहभागी होण्याचे आवाहन ‘कोकण मंडळा’तर्फे करण्यात येत आहे.