"औरंगजेबाच्या कबरीवरील सजावट काढून तिथे एक मोठा बोर्ड लावा आणि..."; राज ठाकरेंची स्पष्ट भूमिका

 

 

औरंगजेबाच्या कबरीबाबत बोलताना राज ठाकरे म्हणाले की, “औरंगजेबाची कबर तिथेच राहू दे. कबरीवरील सजावट काढून टाका. तिथे फक्त कबर दिसली पाहिजे आणि त्या ठिकाणी एक मोठा बोर्ड लावा. आम्हा मराठ्यांना संपवायला आलेला औरंगजेब इथेच गाडला गेला. हा आमचा इतिहास आहे”, असे राज ठाकरे यांनी म्हटले आहे.

 

 

"छत्रपती शिवाजी महाराज हे हिंद प्रांतावर केलेला संस्कार आहे, तो एक विचार आहे. हा विचार संपविण्यासाठी औरंगजेब शिवाजी महाराजांच्या निधनानंतर २७ वर्षे महाराष्ट्रात ठाण मांडून बसला, लढत राहिला, पण ते औरंगजेबाला जमलं नाही आणि शेवटी मराठ्यांनी त्याला इथेच गाडलं. जगाच्या इतिहासात जिथे जिथे औरंगजेब वाचला जातो, अभ्यासला जातो, तेव्हा तिथे छत्रपती शिवाजी महाराजांचे नाव घेतले जाते. त्यामुळे औरंगजेबाची कबर उखडण्यापेक्षा स्वराज्याला संपविण्यासाठी आलेल्या औरंगजेबाला आम्ही इथेच गाडला, असा कबरीसमोर बोर्ड लावा आणि राज्यभरातील विद्यार्थ्यांच्या सहली नेऊन हा पराक्रम त्यांना दाखवा" अश्या शब्दांत राज ठाकरे यांनी आपली भूमिका स्पष्ट केली आहे.