रौप्य महोत्सवी हिंदू नववर्ष स्वागतयात्रेत ठाणेकरांनी अनुभवला "संस्कृतीचा महाकुंभ" स्वागतयात्रेत सर्वधर्मीयांचा उत्साह

 

ठाणे : ढोल-ताशांचा गजर, पारंपरिक वेशभूषा, चौकाचौकात रांगोळ्या...भगवे झेंडे - उपरणे आणि समाज प्रबोधनाचे धडे देणारे आकर्षक चित्ररथ अशा उत्साही वातावरणात गुढीपाडव्यानिमित्त निघालेल्या श्री कौपीनेश्वर सांस्कृतिक न्यास आयोजित हिंदु नववर्ष स्वागतयात्रेत यंदा ठाणेकरांनी "संस्कृतीचा महाकुंभ" अनुभवला. यंदा स्वागतयात्रेचे रौप्य महोत्सवी वर्ष होते. सकाळी ७ वा. श्री कौपिनेश्वर मंदिरात पालखीचे विधीवत पूजन करून प्रारंभ झालेल्या यात्रेत सर्वधर्मियांचा उत्साह दिसून आला. राज्याचे उपमुख्यमंत्री एकनाथ शिंदे, आमदार संजय केळकर, आ. निरंजन डावखरे, माजी खासदार डॉ. विनय सहस्त्रबुद्धे आणि स्वागतयात्रेचे स्वागताध्यक्ष शरद गांगल आदी मान्यवरांनी पालखीचे भोई होत तमाम ठाणेकरांना नववर्षाच्या शुभेच्छा दिल्या.दरम्यान, ठाण्यात घरोघरी गुढी तोरणे उभारून नविन वर्षाचे स्वागत करण्यात आले.

 

श्री कौपीनेश्वर सांस्कृतिक न्यासातर्फे गुढीपाडव्याच्या दिवशी सकाळी कौपिनेश्वर मंदिरातुन मुख्य स्वागतयात्रा काढण्यात आली. या स्वागतयात्रेला जोड म्हणून ठाणे शहरात १२ उपयात्रा देखील निघाल्या होत्या. मुख्य स्वागतयात्रेत ठाणे महापालिकेचा विशेष सहभाग होता. राज्याभिषेक समारोह संस्थेतर्फे संभाजी महाराज बलिदान दिनानिमित्त चित्ररथ, त्याचबरोबर सामाजिक, सांस्कृतिक, शैक्षणिक, पर्यावरण, प्लास्टीक बंदी, अवयवदान जागृती, मतदान जागृती आदी ६० चित्ररथांदवारे प्रबोधन करण्यात आले. स्वागतयात्रेत खासदार नरेश म्हस्के, परिवहन मंत्री प्रताप सरनाईक, ठाणे पालिका आयुक्त सौरभ राव, श्री कौपिनेश्वर सांस्कृतिक न्यासाचे अध्यक्ष उत्तम जोशी, कार्याध्यक्ष संजीव ब्रह्मे, कार्यवाह डॉ. अश्विनी बापट, अरविंद जोशी आदींनी नागरीकांसमवेत पायपीट करीत सहभाग नोंदवला. यंदा हिंदी भाषिकांसह राजस्थानी, दाक्षिणात्य, शीख, पारसी, जैन यासह काही मुस्लीम बांधव आणि विविध प्रांतातील ठाणेकर नागरिक यंदाच्या यात्रेत सहभागी झालेले दिसून आले.

 

पारंपरिक वेषभूषा परिधान करून महिला बाईक रॅलीमध्ये सहभागी झाल्या होत्या. मुख्य चौकांमध्ये सामाजिक संस्थांकडून पालखी आणि चित्ररथांवर पुष्पवृष्टी करण्यात आली होती. तर, ठाणे महापालिका शिक्षण, आरोग्य, घनकचरा व पाणीपुरवठा विभागाचे चित्ररथ याठिकाणी पाहायला मिळाले. घनकचरा विभागाच्या चित्ररथात ठाणे शहर स्वच्छ ठेवण्यासंदर्भात जनजागृती करणारे गीत यावेळी सादर करण्यात आले. जिल्हा परिषदेचा यंदा पहिल्यांदाच चित्ररथ यात्रेत सहभागी झाला होता. त्यावर विविध योजनांची माहिती देण्यात आल्याने हा चित्ररथ सर्वसामान्यांचे लक्ष वेधले.

राज्यात उद्योगांना रेड कार्पेट अंथरले आहे. येथे मोठ्या प्रमाणात दळणवळणाची सुविधा आहे. कुशल कामगार आहेत. आपण सकल राष्ट्रीय उत्पन्नात, उद्यमींमध्ये प्रथम आहोत. अर्थव्यवस्थेत देखील आपली स्थिती इतर राज्यांपेक्षा चांगली आहे. विदेशी गुंतवणूकदार राज्यात येत आहेत कारण येथील वातावरण चांगले आहे.आमच्या सरकारने विविध योजना राबवुन विजयाची गुढी उभारली आहे. भविष्यामध्ये राज्यासाठी विकासाचे पर्व आणखी वेगाने पुढे न्यायचे आहे असे उपमुख्यमंत्री एकनाथ शिंदे स्वागतयात्रे दरम्यान माध्यमांशी बोलताना म्हणाले.

गुढीपाडव्याचा हा साडेतीन मुहूर्तापैकी एक मानला जातो. या दिवशी नवीन सुरवात करायला लोकांची पसंती असते.याचाच भाग म्हणून ठाण्यात गुढीपाडव्याचा मुहुर्तावर सुमारे ५०० हून अधिक ग्राहकांनी आपले स्वप्नातील घरांची नोंद केली आहे.तर एक हजारहून अधिक नागरिकांनी या मुहूर्तावर घराचा ताबा घेतला आहे.यातही घोडबंदर भागाला पुन्हा एकदा ग्राहकांनी पसंती दिल्याचे समोर आले आहे.दसऱ्याच्या निमित्ताने विकासकांनी गृहखरेदी करणाऱ्यांसाठी वेगवेगळ्या सवलती जाहीर केल्या होत्या. ग्राहकांनी त्याला पंसती दिल्याचे दिसून आले.