दिशा सालियान हत्येमागे सेलिब्रेटींचे ड्रग्ज रॅकेट

संजय निरुपम यांचा गौप्यस्फोट; आदित्य ठाकरेंनी सर्वोच्च न्यायालयात खोटी माहिती दिली

28-Mar-2025

Total Views | 19

मुंबई: ( Celebrity drug racket behind Disha Salian murder sanjay nirupam ) दिशा सालियन हत्येमागे मुंबईतील सेलिब्रेटिंचे ड्रग्ज रॅकेट आहे. दिशाचे वडील सतीश सालियन यांनी नव्याने केलेले आरोप गंभीर असून त्यांच्या तक्रारीवर लवकरच मालवणी पोलीस ठाण्यात ‘एफआयआर’ नोंदवला जाईल. दिशा सालियन हत्याकांडात उबाठा आमदार आदित्य ठाकरे यांची मोठी भूमिका असल्याचे पुरावे आहेत. लवकरच आदित्य ठाकरेंवर गुन्हा दाखल होईल, असा गौप्यस्फोट शिवसेना उपनेते तथा प्रवक्ते संजय निरुपम यांनी गुरुवार, दि. २७ मार्च रोजी केला.

मुंबईत येथे आयोजित पत्रकार परिषदेत ते बोलत होते. निरुपम म्हणाले की, “सतीश सालियन यांनी नुकतीच मुंबई पोलीस आयुक्त विवेक फणसळकर यांच्याकडे दिशा सालियन प्रकरणात तक्रार केली आहे. या तक्रारीत आदित्य ठाकरे यांच्यावर गंभीर आरोप करण्यात आले आहेत. याबाबत मालवणी पोलीस ठाण्यात तक्रार दाखल करण्यात येणार आहे. दिशा सालियनची दि. ८ जून २०२० मध्ये हत्या झाली.

ती अभिनेता सुशांत सिंग राजपूत याची मॅनेजर होती. तिचा मृत्यू संशयास्पदरित्या झाला. या दिवशी तिच्या घरी झालेल्या पार्टीमध्ये सर्वजण उपस्थित होते, अशी चर्चा त्या दिवशी झाली होती,“ असे निरुपम म्हणाले. “राज्य सरकारने याप्रकरणी एसआयटीची स्थापना केली असून त्यांच्याकडून चौकशी सुरू आहे. दिशावर सामूहिक अत्याचार करून हत्या केल्याचा आरोप सतीश सालियन यांनी केला आहे.

दिशा सालियनचा शवविच्छेदन अहवाल तीन दिवस उशीराने प्राप्त झाला. तिचा मृतदेह इमारतीपासून २५ फूट लांब आढळून आला. तिच्या शरीरावर कोणत्याही जखमा नव्हत्या. या सगळ्या गोष्टी संशयास्पद असून त्याची नव्याने सखोल चौकशी होणे आवश्यक आहे,“ असे निरुपम म्हणाले.

आदित्य ठाकरेंचा दावा खोटा

“सरकार हे विरोधी पक्षांचा बदला घेण्यासाठी दिशा सालियान प्रकरणाचे राजकारण करत आहेत, असा आदित्य ठाकरे यांचा आरोप खोटा आहे,“ असे निरुपम म्हणाले. ते पुढे म्हणाले की, “आदित्य ठाकरे यांनी सर्वोच्च न्यायालयात ‘सीबीआय’ने क्लीनचिट दिल्याचे खोटे प्रतिज्ञापत्र सादर केले. मात्र, ‘सीबीआय’ने दिशा सालियान प्रकरणाचा नाही, तर सुशांत सिंग हत्येचा तपास केला होता.”