अरेरावी करणाऱ्या टॅक्सी/रिक्षा चालकांवर कारवाईचा बडगा

मुंबई, दि.२२ : प्रतिनिधी प्रवाशांना नियमबाह्य भाडे आकारणे, भाडे नाकारणे तसेच गैरवर्तन करणाऱ्या रिक्षा आणि टॅक्सी तसेच ओला -उबर चालकांच्या तक्रारीसाठी मुंबई महानगर क्षेत्रामध्ये एकच व्हाट्सअप नंबर प्रदर्शित करण्यात येणार आहे. प्रवाशांनी आपल्या गैरसोयीसह या नंबरवर आपली तक्रार नोंदवावी, असे आवाहन परिवहन मंत्री प्रताप सरनाईक यांनी केले आहे. ते वांद्रे पूर्व मतदार संघातील बांद्रा,खार व इतर रेल्वे स्थानक परिसरात रिक्षा व टॅक्सी चालकांच्या अरेरावी संदर्भात बोलावलेल्या बैठकीत बोलत होते.

वांद्रे पूर्वचे आमदार वरुण सरदेसाई यांनी बांद्रा,खार आणि अंधेरी या रेल्वे स्थानक परिसरात प्रवाशांना रिक्षा व टॅक्सी चालकांची अरेरावी सहन करावी लागते. हे चालक नियमबाह्य पद्धतीने भाडे आकारतात. गैरवर्तन करतात, तसेच अनेक प्रवाशांना इच्छित स्थळी सोडण्यास नकार देतात. या संदर्भात परिवहन विभागाने तातडीने ठोस उपाययोजना कराव्यात अशी मागणी केली.

यावर बोलताना मंत्री सरनाईक म्हणाले की, मोटार परिवहन विभाग व वाहतूक पोलीस यांनी मिळून एक संयुक्त पथक नेमावे ज्या भागात अशाप्रकारे प्रवाशानां रिक्षा चालकाकडून त्रास होतो तेथे वारंवार ग्रस्त घालावी. सध्या अंधेरी प्रादेशिक विभागासाठी ९९२०२४०२०२ हा व्हाट्सअप क्रमांक प्रदर्शित करण्यात आला आहे. तथापि , प्रादेशिक विभागनिहाय व्हाट्सअप हेल्पलाईन क्रमांक प्रदर्शित न करता पुर्ण मुंबई महानगर विकास प्राधिकरण क्षेत्रामध्ये एकच व्हाट्सअप एका आठवड्यात प्रदर्शित करावा व त्याला व्यापक प्रसिद्धी द्यावी. जेणेकरून प्रवासी आपल्या तक्रारी संबंधित व्हाट्सअप नंबरवर करतील. तक्रार असलेल्या रिक्षा अथवा टॅक्सी चालकाला परिवहन विभागाने नोटीस पाठवणे आवश्यक असून तक्रारीची गंभीरता लक्षात घेऊन गरज पडल्यास त्याचा परवाना देखील रद्द करण्याची कारवाई करावी, असे निर्देश परिवहन विभागाला मंत्री सरनाईक यांनी दिले आहेत.