अभिनेत्री दीपिका पादुकोण लवकरच मोठ्या पडद्यावर परतणार; मातृत्वानंतरच्या नव्या टप्प्यावर तिचे मत

 

 

 

 

 

 

मुंबई : बॉलिवूडमधील लोकप्रिय अभिनेत्री दीपिका पादुकोण ओम शांती ओम, पद्मावत, पठाण गेल्या काही महिन्यांपासून चित्रपटसृष्टीपासून दूर आहे. सप्टेंबर २०२४ मध्ये ती आणि तिचा पती रणवीर सिंग यांनी त्यांच्या पहिल्या अपत्याचे स्वागत केले. त्यांच्या मुलीचे नाव दुआ पादुकोण सिंग असे ठेवण्यात आले. मुलीच्या जन्मानंतर दीपिका कोणत्याही चित्रपटात झळकलेली नाही. मात्र, आता ती लवकरच कामावर परतण्याच्या तयारीत असून, तिच्या पुनरागमनाबाबत चाहत्यांमध्ये उत्सुकता निर्माण झाली आहे.

 

 

अबू धाबी येथे पार पडलेल्या फोर्ब्स परिषदेच्या वेळी दीपिकाने पहिल्यांदाच आपल्या मातृत्व आणि करिअरबाबत भाष्य केले. ती म्हणाली, “आई झाल्यानंतर कामावर परतताना कोणत्याही प्रकारची अपराधी भावना बाळगायची नाही. माझ्या मुलीची जबाबदारी सांभाळतानाच करिअरमध्येही योग्य समतोल साधण्याचा मी प्रयत्न करत आहे.”

 

तिच्या चित्रपट निवडीवर मातृत्वाचा प्रभाव पडणार असल्याचेही तिने स्पष्ट केले. “मातृत्व हा एक अद्भुत अनुभव आहे. मी जाणीवपूर्वक असे करणार नाही, पण नकळतपणे मी ज्या भूमिका स्वीकारेन त्यावर याचा परिणाम होईल. मात्र, आई होण्याआधीही मी या बाबतीत जागरूक होते.”

 

 

दीपिका लवकरच पंजाबी गायक दिलजीत दोसांजच्या एका संगीत व्हिडिओमध्ये झळकणार असल्याची चर्चा आहे. विशेष म्हणजे, हा प्रकल्प फराह खान कोरिओग्राफ करणार आहे. फराह खाननेच ओम शांती ओम चित्रपटाद्वारे दीपिकाला बॉलिवूडमध्ये पदार्पणाची संधी दिली होती. मात्र, या प्रकल्पाबाबत अद्याप अधिकृत घोषणा झालेली नाही. याशिवाय, दीपिका ‘कल्की २८९८ ए.डी.’ या बहुप्रतिक्षित चित्रपटात दिसणार आहे. प्रभास, अमिताभ बच्चन आणि कमल हसन यांसारख्या दिग्गज कलाकारांसोबत ती स्क्रीन शेअर करणार आहे. हा चित्रपट २०२५ मध्ये प्रदर्शित होण्याची शक्यता आहे.