"छावा चित्रपटात काम करणे मला योग्य वाटले नाही.." अभिनेता भूषण प्रधानने 'या' कारणांमुळे दिला नकार! जरूर वाचा..

 

 

 

मुंबई : अभिनेता भूषण प्रधानने ‘जय भवानी जय शिवाजी’ या मालिकेत छत्रपती शिवाजी महाराजांची भूमिका साकारली होती. नुकत्याच दिलेल्या एका मुलाखतीत त्याने या भूमिकेच्या अनुभवाविषयी आणि ‘छावा’ चित्रपटातील भूमिकेसंदर्भात आपली भूमिका स्पष्ट केली.

 

 

महाराजांची भूमिका साकारण्याचा योग येणं हे माझ्यासाठी मोठं भाग्य असल्याचं भूषणने नमूद केलं. “प्रत्येक सेटवर शेवटच्या दिवशी मी भावूक होतो, पण ‘जय भवानी जय शिवाजी’ च्या शेवटच्या दिवशी मात्र तसं काहीच झालं नाही. आई-वडिलांचे डोळे पाणावले, पण मी शांत होतो. सुरुवातीला हे समजत नव्हतं, पण नंतर जाणवलं की, महाराज माझ्यात कायम आहेत. त्यांनी दिलेली शिकवण माझ्यासोबत आहे आणि त्यामुळेच मी भावनिक झालो नाही,” असं त्याने सांगितलं.

 

 

‘जय भवानी जय शिवाजी’ नंतर भूषणकडे अनेक ऐतिहासिक भूमिका आल्या. यामध्ये ‘छावा’ या हिंदी चित्रपटातील एका भूमिकेसाठीही विचारणा झाली होती. मात्र, त्याने ही भूमिका नाकारण्याचा निर्णय घेतला.

 

 

“माझ्यासाठी प्रत्येक भूमिका महत्त्वाची असते, पण केवळ एखादा चित्रपट हिंदी आहे, मोठा आहे, म्हणून त्यात काम करणं मला योग्य वाटलं नाही. मी महाराजांची भूमिका केली आहे, त्यामुळे ऐतिहासिक व्यक्तिरेखा साकारताना अधिक जबाबदारीने निर्णय घ्यायला हवा, असं मला वाटलं. म्हणूनच ‘छावा’मधील भूमिकेसाठी मी नकार दिला,” असं भूषणने स्पष्ट केलं.

 

 

“कोणत्याही गोष्टीला होकार देणं आणि नकार देणं हे आयुष्यात महत्त्वाचं असतं. मला मिळालेल्या भूमिकेचा मी पूर्ण न्याय द्यायचा प्रयत्न केला. इतिहास समजून घेताना, महाराजांचा अभ्यास करताना अनेक गोष्टी शिकायला मिळाल्या. माझ्या निर्णयांमागेही त्याच शिकवणींचा प्रभाव आहे,” असं तो म्हणाला. छत्रपती शिवाजी महाराजांसारखी भूमिका साकारण्याची संधी मिळणं ही भाग्याची गोष्ट असते. परंतु त्या संधीला न्याय देणं आणि त्यानंतर पुढील निर्णय काळजीपूर्वक घेणं हे तितकंच महत्त्वाचं असतं, हे भूषण प्रधानच्या या भूमिकेवरील वक्तव्यांमधून स्पष्ट होतं.