महेश आहेर मारहाण प्रकरण : 'त्या' चौघा हल्लेखोरांना न्यायालयीन कोठडी

या प्रकरणात पोलिसांनी आ. जितेंद्र आव्हाड यांचे खासगी स्वीय साहाय्यक अभिजीत पवार, राष्ट्रवादीचे पदाधिकारी विक्रम खामकर, हेमंत वाणी आणि विशांत गायकवाड या चौघांना अटक केली होती. त्यांना सोमवारपर्यंत पोलीस कोठडी सुनावण्यात आली होती. तर आव्हाड यांनी अटकपूर्व जामीनासाठी न्यायालयात अर्ज केल्यानंतर न्यायालयाने त्यांना अटकपुर्व अंतरिम जामीन दिला होता.तर सोमवारी अभिजीत, विक्रम, हेमंत आणि विशांत या चौघा हल्लेखोरांना ठाणे सत्र न्यायालयाने न्यायालयीन कोठडी सुनावली आहे.

 

ठाणे महापालिका सहायक आयुक्त महेश आहेरच्या निलंबनासाठी सोमवारी काँग्रेस आणि राष्ट्रवादीच्या महिलासोबत आव्हाडांच्या पत्नी ऋता आव्हाड रस्त्यावर उतरल्या. राष्ट्रवादीच्या महिलांनी काळे कपडे परिधान करत पक्ष कार्यलय ते ठाणे महापालिकेपर्यंत मोर्चा काढला. त्यानंतर काँग्रेस आणि राष्ट्रवादीच्या कार्यकर्त्यांनी ठाणे महापालिकेसमोर ठिय्या देत संयुक्तपणे आंदोलन केले. आहेर याच्यावर गुन्हा दाखल करून तात्काळ निलंबित करावे. अशी मागणी यावेळी करण्यात आली.अनधिकृत बांधकामा विरोधात आ.आव्हाड व आ. संजय केळकर लढा देत असल्याचे भाष्यही आंदोलकांनी केले.