कन्नड सुपरस्टार मेघा शेट्टीचे मराठी सिनेसृष्टीत पदार्पण

 

 

 

मुंबई : नुकतेच आफ्टर ऑपरेशन लंडन कॅफे सिनेमाचे दुसरे पोस्टर प्रदर्शित झाले आहे. निर्माते दिपक राणे यांनी आपल्या या सिनेमातून कन्नड सुपरस्टार मेघा शेट्टी हिला मराठी सिनेमात प्रथमच लाँच केले आहे. मेघा शेट्टी ही कन्नड टीव्ही आणि सिनेमातील लोकप्रिय अभिनेत्री आहे. मेघाची 'जोथे जोलाई' ही मालिका चांगलीच गाजली होती. ट्रायबल रायडींग आणि दिलपसंद या सिनेमातही मेघाने काम केले आहे. कन्नड इंडस्ट्रीतील सर्वात व्यग्र अभिनेत्री म्हणून मेघाचे नाव घेतले जाते.

 

 

 

 

दीपक राणे फिल्म्स आणि इंडियन फिल्म फॅक्ट्री यांची निर्मीती असलेला 'आफ्टर ऑपरेशन लंडन कॅफे' हा रोमँटिक -अॅक्शनपट आहे. या सिनेमात कन्नड स्टार कवीश शेट्टी मुख्य भूमिकेत आहे आणि त्याचं पोस्टर नुकतेच प्रदर्शित करण्यात आले होते. त्यानंतर आता या सिनेमातील नायिका मेघा शेट्टी हिचे देखील पोस्टर प्रदर्शित कऱण्यात आले आहे. मेघाच्या वाढदिवसानिमित्त तिचा या सिनेमातील लूक समोर आला आहे. कवीशचे पोस्टर अॅक्शन अंदाजात दिसून आले होते. तर मेघाचा लूक हा शांत, साधा, सालस असा आहे. बघितल्यावरच प्रेमात पडावे असा लूक मेघाचा आहे.

 

 

 

 

'आफ्टर ऑपरेशन लंडन कॅफे' हा सिनेमा दीपक राणे फिल्म्स आणि इंडियन फिल्म फॅक्ट्रीनी एकत्रित येऊन केलेला हा सिनेमा मराठी आणि कन्नड भाषेत चित्रीत झाला आहे. तर हिंदी, तमिळ, तेलगु, मल्याळम भाषेतही हा सिनेमा प्रदर्शित होणार आहे. या सिनेमात कन्नड कलाकार कवीश शेट्टी, मेघा शेट्टी या सोबत मराठीतील शिवानी सुर्वे, विराट मडके या कलाकारांचा समावेश आहे. सदागरा राघवेंद्र यांनी हा सिनेमा दिग्दर्शीत केला आहे. तर दीपक राणेंसोबत या सिनेमाची निर्मीती विजय कुमार शेट्टी आणि रमेश कोठारी यांनी केली आहे. हा सिनेमा जानेवारी २०२३ मध्ये प्रदर्शित होईल.