दापोली तालुक्यातील कांदळवनांना 'निसर्ग'चा सर्वाधिक फटका!

 

 

 

 

मुंबई(प्रतिनिधी): महाराष्ट्रातील रायगड आणि रत्नागिरी जिल्ह्यातील समुद्रकिनाऱ्यावरील कांदळवन असलेल्या आणि कांदळवन नसलेल्या क्षेत्रावर निसर्ग वादळाचा झालेला परिणामांचा अभ्यास नुकताच प्रकाशित करण्यात आला. मंगळवारी दि. २६ जुलै रोजी आंतरराष्ट्रीय कांदळवन परिसंस्था संवर्धन दिनानिमित्त आयोजित कार्यक्रमात, हा अहवाल मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचा हस्ते प्रकाशित करण्यात आला.

 

 

महाराष्ट्राच्या पश्चिम किनारपट्टीवर दि. ३ जून २०२० रोजी महा प्रचंड 'निसर्ग' वादळाने धडक दिली, आणि त्यामुळे या भागातील बांधकामे, शेतीचे भयंकर नुकसान झाले. तसेच किनाऱ्यावरील अधिवासांवर अतोनात परिणाम झाला. हा परिणाम रायगड आणि रत्नागिरी जिल्ह्यांमध्ये मोठ्या प्रमाणात दिसून आला. या काळातील मिळालेल्या वृत्तानुसार वादळ-वारे हे जवळपास १२० किमी / तास वेगाने वाहत होते आणि या वादळाचा मध्यबिंदू रायगड जिल्ह्यातील कालींजे गावाजवळ होता. त्यामुळे या भागातील हरणाई, दापोली (दक्षिण), दिवेआगर आणि श्रीवर्धन (उत्तर) भागातील समुद्रकिनाऱ्यावर याचा प्रचंड विपरीत परिणाम झालेला दिसून आला. याच प्रमाणे रत्नागिरी आणि सिंधुदुर्ग जिल्ह्यातील दक्षिणेकडील समुद्रकिनाऱ्यावर तसेच ठाणे आणि पालघर जिल्ह्यामध्ये देखील या प्रकारचे नुकसान झाल्याचे नोंद झाली आहे. 'निसर्ग' वादळाच्या पाठोपाठ त्याही पेक्षा अधिक विध्वंसक असे तौक्ते वादळ १२ ते १९ मे २०२१ च्या दरम्यान महाराष्ट्र किनारपट्टीच्या समांतर १८० किमी अंतरावरून उत्तरेकडे गेले.

 

 

या वादळांच्या परिणामांचा अभ्यास करण्याकरिता राज्याच्या कांदळवन कक्षाने 'सृष्टी काँझरव्हेशन फाउंडेशन'ला आर्थिक सहाय्य पुरविले होते. कांदळवन असलेले आणि कांदळवन नसलेल्या क्षेत्रांवर वादळाचा झालेला परिणाम हा वेगवेगळ्या प्रमाणात झालेला असल्याचे दिसून येत आहे. आणि त्यानंतर ते पूर्ववत होत असतानाची पद्धत देखील वेगवेगळी असल्याचे लक्षात येत आहे. हा अभ्यास हा सात समूह क्षेत्रांमध्ये करण्यात आला. यात दिघी - दिवेआगर, आरावी, श्रीवर्धन – कालींजे, वेळास – बाणकोट, केळशी – साखरी, आडे-उतांबर आणि आंजर्ले – पाज या समूह क्षेत्रांचा समावेश होतो.