गोंदिया : भंडारा-गोंदिया येथील लोकसभा मतदारसंघामध्ये उद्या होणाऱ्या मतदानासाठी निवडणूक आयोगाने महाराष्ट्रातीलच ईव्हीएम मशीन्सचा वापर करावा, अशी मागणी राष्ट्रवादी कॉंग्रेसचे प्रदेशाध्यक्ष जयंत पाटील यांनी केली आहे. निवडणुकांसाठी वापरल्या जाणाऱ्या मशीन्स या खराब असल्याचा दावा पाटील यांनी केला असून मतदानासाठी राज्यातीलच मशीन्सचा वापर करण्यात यावा, असे पाटील यांनी म्हटले आहे.

पाटील यांनी मुख्य निवडणूक आयुक्तांना पत्र पाठवून याविषयी माहिती दिली आहे तसेच आवाहन केले आहे. या पोटनिवडणुकांमध्ये मतदानासाठी वापरल्या जाणाऱ्या मशीन्स या गुजरात आणि सुरतहून मागवण्यात आल्या आहेत. परंतु या मशीन्सची तपासणी केली असता यातील बऱ्याचशा मशिन्स या खराब असल्याचे निदर्शनात आलेले आहे. त्यामुळे गुजरात आणि सुरतहून मागाव्यात आलेल्या कोणत्याही इव्हीम मशीनचा वापर मतदानासाठी करण्याऐवजी महाराष्ट्रात उपलब्ध असलेल्या मशीन्स वापर मतदानासाठी करण्यात यावा, अशी मागणी पाटील यांनी केली आहे. याचबरोबर मतदानात वापरल्या जाणाऱ्या व्हीव्हीपॅट मशीन्स देखील अत्यंत धीम्या असून त्यामुळे मतदाराला पावती मिळण्यास उशीर होत असल्याचे पाटील यांनी म्हटले आहे. त्यामुळे आयोगाने याकडे देखील लक्ष द्यावे, अशी मागणी त्यांनी केली आहे.