फराह खानच्या 'या' वक्तव्यावर वाद; हिंदुस्तानी भाऊंनी दाखल केली तक्रार!

 

  

मुंबई : बॉलिवूड दिग्दर्शक आणि नृत्यदिग्दर्शक फराह खान यांनी हिंदू सण होळीबद्दल कथितरीत्या अवमानकारक वक्तव्य केल्याप्रकरणी सोशल मीडिया इन्फ्लुएंसर विकास फाटक उर्फ हिंदुस्तानी भाऊ यांनी त्यांच्या वकिलामार्फत मुंबईतील खार पोलीस ठाण्यात तक्रार दाखल केली आहे. तक्रारीत फराह खानने होळी साजरी करणाऱ्यांना ‘छपरी’ संबोधून हा सण विनाकारण बदनाम करण्याचा प्रयत्न केला असल्याचा आरोप करण्यात आला आहे. ‘छपरी’ हा शब्द सामान्यतः संस्कारहीन किंवा असभ्य व्यक्तींना उद्देशून वापरला जातो, त्यामुळे हा शब्दप्रयोग हिंदू समाजाच्या भावना दुखावणारा असल्याचे हिंदुस्तानी भाऊंनी म्हटले आहे.

 

त्यांचे वकील अ‍ॅड. अली काशिफ खान देशमुख यांनी अशा वक्तव्यांविरोधात कठोर कारवाई करण्याची मागणी केली आहे. "माझा क्लायंट सुरुवातीपासूनच धर्मविरोधी द्वेष आणि अपमानास प्रवृत्त करणाऱ्या वक्तव्यांविरोधात आवाज उठवत आला आहे. बॉलिवूडसारख्या मोठ्या क्षेत्रातील लोकांनी त्यांच्या शब्दांवर नियंत्रण ठेवले पाहिजे," असे त्यांनी स्पष्ट केले.

 

या प्रकरणात फराह खान यांच्याविरोधात भारतीय न्याय संहिता बीएनएस, २०२३ मधील कलम १९६, २९९, ३०२ आणि ३५३ अंतर्गत गुन्हा दाखल करण्याची मागणी करण्यात आली आहे. या कलमांतर्गत धार्मिक भावना दुखावणे, द्वेष पसरवणे आणि जाणीवपूर्वक अपमानकारक विधान करणे यासंदर्भात कारवाई होऊ शकते. तसेच, तक्रारीत फराह खान यांनी भारतीय संविधानाच्या अनुच्छेद १९ नुसार असलेल्या अभिव्यक्ती स्वातंत्र्याचा गैरवापर केल्याचा आरोप करण्यात आला आहे. दरम्यान, खार पोलिसांनी अद्याप एफआयआर नोंदवलेले नाही. पोलिसांकडून या प्रकरणाचा तपास सुरू असून अधिक तपशील देण्यास त्यांनी नकार दिला आहे. ही वादग्रस्त टिप्पणी एका टेलिव्हिजन शोमध्ये करण्यात आल्याचा आरोप असून, सोशल मीडियावर तिच्यावर तीव्र प्रतिक्रिया उमटत आहेत. हिंदुस्तानी भाऊ यांनी त्वरित कायदेशीर कारवाईची मागणी केली आहे.