स्थानिक स्वराज्य संस्थांच्या निवडणूका महायुतीतच लढणार! मंत्री चंद्रशेखर बावनकुळेंनी केले स्पष्ट

 

 

नागपूर : स्थानिक स्वराज्य संस्थांच्या निवडणूका महायुतीतच लढणार, असे महसूल मंत्री आणि भाजप प्रदेशाध्यक्ष चंद्रशेखर बावनकुळे यांनी स्पष्ट केले आहे. सोमवार, १७ फेब्रुवारी रोजी त्यांनी नागपूर येथे माध्यमांशी संवाद साधला.

 

मंत्री चंद्रशेखर बावनकुळे म्हणाले की, "आम्ही लोकसभा आणि विधानसभा महायुतीत लढलो असून पुढच्या स्थानिक स्वराज्य संस्थांच्या निवडणूकासुद्धा महायुतीत लढण्याचा आमचा विचार आहे. सुप्रीम कोर्टात ओबीसी आरक्षणासंबंधी असलेल्या सर्व बाबींवर सरकारकडून उत्तर दिले आहे. यावर सुप्रीम कोर्टात लवकरात लवकर निकाल लागेल आणि तातडीने स्थानिक स्वराज्य संस्थांच्या निवडणूका लागतील. स्थानिक स्वराज्य संस्थांमध्ये नगरसेवक, जिल्हा परिषद सदस्य नसल्यामुळे विकासाला बाधा निर्माण होते. त्यामुळे या निवडणूका तातडीने व्हाव्यात, अशी अपेक्षा आहे."

 

"सर्वांनी आपापल्या पक्षांची ताकद वाढवली पाहिजे. आम्ही महायूतीमध्ये लढणार आहोत. त्यामुळे आपापला पक्ष वाढवण्याचे काम सुरु आहे. आम्ही १ कोटी ५१ लाख प्राथमिक सदस्य करतो आहोत. येणाऱ्या काळात ३ लक्ष कार्यकर्त्यांना सक्रीय करणार आहोत. सरकारच्या योजना समाजापर्यंत जाण्यासाठी आम्ही सगळे काम करत आहोत," असे त्यांनी सांगितले.