जागृत चर्चा व्हायला हवी!

 

आयआयटी मद्रास’चे संचालक प्रा. वी. कामकोटी (Prof. V. Kamkoti) यांचा एक व्हिडिओ व्हायरल झाला. त्या व्हिडिओनुसार, “गोमूत्रामध्ये अ‍ॅन्टी-बॅक्टिरियल आणि अ‍ॅन्टी-फन्गल गुण असून, त्यामुळे अनेक रोग बरे होऊ शकतात,” या विधानाचे त्यांनी समर्थन केले आहे. मात्र, यावरून काँग्रसेचे नेते कार्ती चिदंबरम म्हणाले की, “आयआयटी’चे संचालक कामकोटी यांचा बनावटी विज्ञानाचा प्रचार करणे, हे अत्यंत अशोभनीय आहे,” तर डीएमके नेता टी. एस. एलांगोवन यांनी प्रा. कामकोटी यांना ‘आयआयटी’च्या संचालक या पदावरून हटवण्याची मागणी केली आहे.

 

कामकोटी यांची जानेवारी 2022 साली ‘आयआयटी मद्रास’चे निदेशक म्हणून नियुक्ती झाली. गोमूत्रामध्ये औषधी गुण असतात, यासाठीचा आधार म्हणून त्यांनी जून 2021 साली वैज्ञानिक पत्रिका ‘नेचर’ मध्ये प्रकाशित झालेल्या लेखाचा आधार घेतला. या लेखामध्ये ‘राष्ट्रीय डेअरी अनुसंधान संस्थान’चे ‘पशू जैव प्रौद्योगिकी केंद्र’ आणि ‘सेल बायोलॉजी’ आणि ‘प्रोटिओमिक्स’ प्रयोगशाळेशी संबंधित असलेल्या वैज्ञानिकांनी गोमूत्राच्या गुणासंदर्भात माहिती दिली आहे. वैज्ञानिकांनी या लेखात निष्कर्ष काढला की, गोमूत्रामधले ‘पेप्टाइड्स’ हे मूत्राशी संबंधित विभिन्न जैव गतिविधीसाठी महत्त्वपूर्ण आहे. या निष्कर्षाच्या समर्थनार्थ आणखीन पाच शोध प्रबंधाबद्दलही त्यांनी माहिती दिली. या अनुषंगाने गोमूत्रामध्ये औषधीगुण असतात, असे म्हटल्याने काँग्रेस आणि डीएमकेच्या नेत्यांना इतके चिडायचे कारण काय? तर हिंदूविरोधी राजकारण्यांना हिंदू धर्म श्रद्धा आणि प्रतीके याबद्दल पराकोटीचा द्वेष आणि भीती आहे. गोमूत्र हे औषधी आहे, असे म्हटले तर हिंदूंच्या गोपूजनाला, गोश्रद्धेला मानल्यासारखे होईल. गाईच्या इतर गोष्टी तर सोडाच. पण, मूत्रामध्येही जीवनानुकूलता आहे, असे म्हटले तर हिंदूंच्या गोसंवर्धनाच्या वैज्ञानिक दृष्टीला स्वीकारल्यासारखे आहे. त्यामुळेच काँग्रेससह डीएमके पक्षाला पेाटशूळ उठला. प्रा. कामकोटी यांनाही अभिव्यक्ती स्वातंत्र्य, धार्मिक श्रद्धा राखण्याचा संविधानानुसार हक्क आहे, हे काँग्रेस आणि डीएमके पक्ष विसरतो. काहीही म्हणा प्रा. कामकोटी यांच्या वक्तव्याने देशभरात गोमूत्रासंदर्भात समर्थन आणि विरोध अशा दोन्ही बाजूने जागृती आणि संशोधन होईल. हिंदू गाईला माता मानतात, यामागच्या वैज्ञानिक कारणासंदर्भात जागृत चर्चा तर होईल.