ब्रेकिंग! MPSC ची तारीख पुढे ढकलली

 

 

पुणे : महाराष्ट्र लोकसेवा आयोगाने एमपीएससीची परिक्षा पुढे ढकलण्याचा निर्णय घेतला आहे. आयबीपीएस आणि एमपीएससीची राज्यसेवा पूर्व परीक्षा दि. २५ ऑगस्ट रोजी एकाच दिवशी येत असल्याने विद्यार्थ्यांनी आंदोलनाची हाक दिली होती. मात्र, देवेंद्र फडणवीस यांनी दिलेल्या सूचनांनंतर एमपीएससीने संयुक्त पूर्व परीक्षा पुढे ढकलण्याचा निर्णय घेतला आहे.

 

पुण्यातील शास्त्री रोडवर MPSC च्या विद्यार्थ्यांचं आंदोलन सुरु आहे. त्यामुळे मोठ्या प्रमाणात वाहतूक कोंडी झाली आहे. २५ ऑगस्टला घेण्यात येणारी MPSC ची परिक्षा पुढे ढकलण्यात यावी या मागणीसाठी MPSC चे विद्यार्थी रस्त्यावर उतरले आहेत. शरद पवार गटाचे नेते रोहित पवारदेखील या आंदोलनात सहभागी झाले आहेत. गेल्या दोन दिवसांपासून हे आंदोलन सुरु आहे. एमपीएससी आणि आयबीपीएसची परिक्षा एकाच दिवशी घेण्यात येणार असल्याने एमपीएससीची तारीख पुढे ढकलण्यात यावी, अशी या आंदोलनकर्त्या विद्यार्थ्यांची मागणी आहे.

 

 

दरम्यान, गुरुवारी सकाळी १० वाजता यासंदर्भात महाराष्ट्र लोकसेवा आयोगाची बैठक पार पडली. या बैठकीमध्ये रविवार, २५ ऑगस्ट रोजी नियोजित महाराष्ट्र राजपत्रित नागरी सेवा संयुक्त पूर्व परीक्षा २०२४ पुढे ढकलण्याचा निर्णय घेण्यात आला. या परीक्षेची पुढील तारीख लवकरात लवकर जाहिर करण्यात येणार असल्याचे आयोगाने सांगितले आहे.