‘हॉरर-कॉमेडी’चा झणझणीत तडका ‘काकूडा’

‘काकूडा’ चित्रपटाची कथा सुरु होते रतौडी या गावातून. महत्त्वाची बाब म्हणजे, दै. ‘मुंबई तरुण भारत’शी बोलताना या चित्रपटाचे दिग्दर्शक आदित्य सरपोतदार यांनी सांगितले होते की, “मथुरेतील एका गावातील ही एक खरी कथा आहे आणि या सत्यघटनेच्या आधारावर ‘काकूडा’ चित्रपटाचे कथानक बांधण्यात आले आहे.”या रतौडी गावातील प्रत्येक घरात दोन दरवाजे. त्यापैकी मोठा सदस्यांसाठी आणि लहान ‘काकूडा’साठी. दररोज संध्याकाळी न चुकता ७.१५ वाजता घरातील एका पुरुषाने तो लहान दरवाजा ‘काकूडा’साठी उघडणं गरजेचं असतं. जर का तसं केलं नाही तर ‘काकूडा’ त्यांना श्राप देतो आणि त्या पुरुषाच्या पाठीवर भलंमोठं कुबड येऊन त्याचा अवघ्या १३ दिवसांत मृत्यू होतो. गेली अनेक वर्षे सातत्याने रतौडी गावातील पुरुष ‘काकूडा’साठी सायंकाळी दरवाजा उघडत असतात. पण, एकेदिवशी चित्रपटातील नायकाला (अभिनेता साकीब सलीम) काही वैयक्तिक कारणांमुळे सायंकाळी दरवाजा उघण्यास विलंब होतो आणि त्याला ‘काकूडा’चा श्राप लागतो.


परिणामी, कुबड येऊन त्याच्या मृत्यूच्या १३ दिवसांचा काळ सुरु होतो. मात्र, या सगळ्यावर इंदूचा (अभिनेत्री सोनाक्षी सिन्हा) विश्वास नसतो; याउलट तिचं असं म्हणणं असतं की, रतौडी गावात गंभीर आजाराची महामारी पसरली आहे आणि डॉक्टर त्यावर उपचार करु शकतात. आपल्या नवर्‍याला वाचवण्यासाठी इंदू डॉक्टरांचा सल्ला घेते खरा, पण त्याचा काहीएक उपयोग होत नाही. मग शेवटी त्याला वाचवण्यासाठी एन्ट्री होते ‘घोस्ट हंटर’ विक्टरची (अभिनेता रितेश देशमुख). पुढे मग इंदू या भूतांचा शोध घेणार्‍या विक्टरच्या मदतीने ‘काकूडा’चा सामना कसा करते? विक्टर ‘काकूडा’चा उजवा पाय का कापतो? याची उत्तरं जाणून घेण्यासाठी ‘जिओ सिनेमा’वर ‘काकूडा’ चित्रपट पाहावा लागेल. हिंदी चित्रपटसृष्टीत सध्या चरित्रपट, अ‍ॅक्शनपट किंवा अन्य भाषांमधील चित्रपटांचे ‘रिमेक’ यापलीकडे काहीतरी पाहावे, अशी प्रेक्षकांची नक्कीच इच्छा असेल आणि ‘काकूडा’च्या माध्यमातून प्रेक्षकांना काहीतरी वेगळा आशय नक्की पाहायला मिळतो.

 

 

आता अभिनयाबद्दल बोलायचे झाले तर अभिनेता रितेश देशमुख याने त्याचे विनोदी अंग नेहमीप्रमाणे जपले आहे. शिवाय अभिनेत्री सोनाक्षी सिन्हानेदेखील उत्तम अभिनय केला आहे. मात्र, या चित्रपटात विशेष कौतुक केलं पाहिजे ते म्हणजे सनीच्या मित्राचं पात्र ज्याने साकारलं त्या आसिफ खान याचं. बर्‍याचवेळी असं होतं की, छोटेखानी भूमिका साकारलेला कलाकार फारसा लक्षात राहत नाही किंवा मोठ्या कलाकारांच्या मागे तो झाकोळून जातो. पण, आसिफ याने साकारलेल्या केल्वीश या पात्राबद्दल तसं झालं नाही. संपूर्ण चित्रपटात त्याने उल्लेखनीय काम केले असून, काहीवेळा त्याने सोनाक्षीलाही अभिनयाच्या बाबतीत मागे टाकलं आहे. त्यामुळे खर्‍या अर्थाने कौटुंबिक ‘हॉरर-कॉमेडी’ चित्रपट या यादीत ‘काकूडा’ या चित्रपटाचा समावेश झाला आहे, असे म्हटले तर वावगे ठरणार नाही.