“बिग बॉसच्या घरातून शेवटी बाहेर पडताना मी फक्त…”, त्या क्षणाच्या आठवणीत नेहा शितोळे भावूक

 

 

 

 

मुंबई : मराठी बिग बॉसचा दुसरा सीझन २०१९ मध्ये आला होता. यात शिव ठाकरे आणि नेहा शितोळे या दोन स्पर्धकांनी बिग बॉसच्या घरातून शेवटी बाहेर पाऊल ठेवले होते. सीझन २ चा विजेता शिव ठाकरे झाला होता. त्यावेळी मनात नेमकं काय सुरु होतं याची कबूली नेहा शितोळे हिने दिली आहे. ‘महाएमटीबी’च्या Unfiltered गप्पा’ या भागात तिने बिग बॉसच्या घरातील काही क्षण शेअर केले आहेत.

 

नेहा म्हणाली की, “बिग बॉसच्या घरातून ज्यावेळी बाहेर पडायचं असं लक्षात आलं आणि काही क्षणात मला घराचा दरवाजा ओलांडून बाहेर जायचं होतं, त्यावेळी मी फक्त त्या घराला डोळ्यात सामावून घेत होते. कारण, मला पुन्हा हे घर कधीच पाहायला मिळणार नव्हतं. त्याचं कारण असं की, एकदा का तो सीझन संपला की ते संपुर्ण घर जमीनदोस्त होतं. पुढच्या कोणत्याही सीझनमध्ये तुम्ही बिग बॉसच्या घरात गेलात तरी तुमचं ते घर तुम्हाला पुन्हा दिसत नाही”.

 

पुढे नेहा म्हणाली की, “शिव ठाकरे जरी तो सीझन जिकला असला तरी माझ्यात आणि त्याच्यात केवळ बक्षीसाची रक्कम आणि ट्रॉफिचा फरक आहे. बिग बॉसच्या घरात त्याच्यापेक्षा अधिक काही क्षण मी जगले आहे कारण घरात आत मी त्याच्याआधी गेले होते. त्यामुळे ते घर खरचं तुम्हाला तुमचा स्वत:चा वेळ आणि स्वत:ला जाणून घेण्याची एक संधी देखील नक्कीच देतं”, अशी जुन्हा बिग बॉसच्या आठवणीत नेहा रमली.