अनुपम खेर यांच्या कार्यालयात चोरी; आरोपी माजिद शेख आणि दलेर खानला पोलिसांनी घेतले ताब्यात

 

 

मुंबई : प्रसिद्ध अभिनेते अनुपम खेर यांच्या कार्यालयाचे कुलूप तोडून चोरीच्या गुन्ह्यात पोलिसांनी दोन चोरांना अटक केली आहे. माजिद शेख आणि दलेर बहरीम खान अशी आरोपींची नावे आहेत. या दोघांनी बुधवार, दि. १९ जून २०२४ रात्री जोगेश्वरी परिसरात असलेल्या अभिनेत्याच्या कार्यालयात चोरी केली होती. एवढ्या लवकर कारवाई करून चोरांना अटक केल्याबद्दल अनुपम खेर यांनी मुंबई पोलिसांचे आभार मानले असून त्यांच्यासाठी एक पोस्टही लिहिली आहे.

 

अनुपम खेर यांनी त्यांच्या इन्स्टा अकाऊंटवर चोरांचा फोटो पोस्ट केला आहे. या फोटोत पोलिसांनी चोरट्यांना पकडले असून ते पोलिस स्टेशनसमोर उभे आहेत. अनुपम खेर यांनी त्यांच्या चिठ्ठीत लिहिले की, “मुंबई पोलिसांचे मनापासून आभार आणि कौतुक. माझ्या कार्यालयाची तोडफोड करणारे, माझी तिजोरी चोरणारे दोन चोर पकडले गेले आहेत. हे सर्व ४८ तासात केल्याने पोलिसांची अप्रतिम कार्यक्षमता दिसून येते!! विजयी व्हा!"

 

 

मुंबईतील वीरा देसाई रोडवर असलेल्या अनुपम खेर यांच्या कार्यालयात बुधवारी रात्री चोरी झाली होती. चोरट्यांनी त्यांच्या कार्यालयातून रोख रक्कम आणि फिल्म निगेटिव्हने भरलेली तिजोरी चोरून नेली. त्यानंतर एफआयआर दाखल करण्यात आला, ज्यावर पोलिसांनी आरोपींना लवकरात लवकर पकडण्याचे आश्वासन दिले. त्यानंतर २२ जून रोजी पोलिसांनी माजीद शेख आणि मोहम्मद दलेर बहरीम खान यांना अटक केली.

 

हे दोघेही सराईत गुन्हेगार असल्याचे मुंबई पोलिसांनी सांगितले. या दोघांनी आंबोली परिसरातील वीरा देसाई रोडवरील अनुपम खेर यांच्या कार्यालयाचे कुलूप तोडले होते. तेथून त्यांनी अभिनेत्याच्या कंपनीने तयार केलेल्या चित्रपटाचे निगेटिव्ह आणि ४.१५ लाख रुपये चोरले. याच चोरट्यांनी त्याच रात्री विलेपार्ले येथेही चोरी केली होती. दुसऱ्या दिवशी सकाळी अनुपम खेर यांच्या कार्यालयातील एका व्यक्तीने तक्रार दाखल केली होती. यानंतर आंबोली पोलिस ठाण्याच्या पथकाने कारवाई करत दोन्ही चोरट्यांना अटक केली. त्यांच्याकडून चोरीच्या पैशातील काही रक्कम जप्त करण्यात आली आहे.