रितेश-सोनाक्षीसोबत मथुरेतील भूत करणार धम्माल, दिग्दर्शक आदित्य सरपोतदार म्हणाले...

 

 

 

 

 

मुंबई : आदित्य सरपोतदार दिग्दर्शित ‘मुंज्या’ हा हिंदी चित्रपट सध्या बॉक्स ऑफिसवर धुमाकुळ घालत आहे. ७ जून २०२४ रोजी प्रदर्शित झालेल्या या चित्रपटाने आत्तापर्यंत ३० कोटींच्या पुढे यशस्वी कमाई केली आहे. हिंदीतील पहिलाच हॉरर-कॉमेडी सुपरहिट झाल्यानंतर आदित्य सरपोतदार आणखी एक हॉरर-कॉमेडी चित्रपट भेटीला घेऊन येणार आहेत. गेल्या काही दिवसांपासून पुन्हा आदित्य आणि रितेश देशमुख यांची जोडी जमणार असे म्हटले जात होते आता त्यांच्या या आगामी चित्रपटावर आदित्य सरपोतदार यांनी ‘दै. मुंबई तरुण भारत’शी बोलताना शिक्कामोर्तब केला आहे.

 

आदित्य सरपोतदार यांचे आगामी हिंदी चित्रपट लवकरच येणार असून त्यापैकी एका चित्रपटाबद्दल माहिती देताना ते म्हणाले की, “अभिनेता रितेश देशमुख आणि अभिनेत्री सोनाक्षी सिन्हा यांच्यासोबत 'काकूडा' हा चित्रपट मी दिग्दर्शित केला असून ओटीटीवर लवकरच हा चित्रपट प्रदर्शित होणार आहे. 'काकूडा' हा चित्रपटही हॉरर-कॉमेडी असून ही कथा मथुरेतील एका गावाची आहे. त्या गावात एक भूत आहे ज्याला काकूडा म्हटलं जातं. तर ती कथा या चित्रपटातून मांडण्याचा प्रयत्न करणार आहे”.

 

दरम्यान, ‘मुंज्या’ या चित्रपटात अभय वर्मा, शर्वरी वाघ, सुहास जोशी, भाग्यश्री लिमये, मोना सिंग, अजय पुरकर यांच्या महत्वपुर्ण भूमिका आहेत. कोकणातील चेटुकवाडीतील ही काल्पनिक कथा ‘मुंज्या’ या चित्रपटातून फार उत्तमरित्या मांडली आहे.