सुप्रिया सुळेंना चित्राताईंचा खोचक टोला, म्हणाल्या, "तुमच्या बगलबच्च्या..."

 

 

मुंबई : तुमच्या बगलबच्च्या कंत्राटदारांना दूर ठेवा, असा खोचक टोला भाजप नेत्या चित्रा वाघ यांनी सुप्रिया सुळेंना लगावला आहे. रविवारी पुण्याचे खासदार मुरलीधर मोहोळ यांनी मंत्रिपदाची शपथ घेतली. यावर सुप्रिया सुळेंनी टीका केली होती. त्यानंतर आता चित्रा वाघ यांनी त्यांना जोरदार प्रत्युत्तर दिलं आहे.

 

चित्रा वाघ म्हणाल्या की, "एका सर्वसामान्य घरातल्या शेतकऱ्याच्या मुलाला केंद्रीय मंत्रिपद मिळाल्याचं तुमच्या पचनी पडलेलं दिसत नाही. मुरलीअण्णा तुमच्यासारखे घराणेशाहीच्या भांडवलावर नव्हे, तर पक्षनिष्ठा आणि जनतेच्या प्रेमाच्या बळावर राजकीय गरूडभरारी घेऊ शकलेत. मनाचा उमदेपणा दाखवून त्यांच्या कर्तृत्वाबद्दल आनंद व्यक्त करायचा सोडून आपण आपल्या स्वभावाला साजेशी मळमळ मात्र व्यक्त केलीत."

 

 

"पण मला खात्री आहे की, मुरलीअण्णांना संसदेत पहायची तुम्हाला लवकरच सवय होईल. तेव्हा ते फक्त पुण्यापुरताच नाही, बारामतीपुरताच नाही तर अवघ्या देशाच्या विकासाचे निर्णय घेताना तुम्हाला दिसतील. तुम्ही मात्र बारामतीच्या ग्रामीण भागातील जनतेला मागच्या १५ वर्षांपासून शेती आणि पिण्याच्या पाण्याच्या आश्वासनावर झुलवत आलात, यावेळी किमान तेवढं तरी पूर्ण करायचं बघा. त्यासाठी तुम्ही तुमच्या बगलबच्च्या कंत्राटदारांना दूर ठेवा. नाहीतर बारामतीची जनता पुढल्या वेळी कंत्राटदारांसोबत तुम्हालाही दूर ठेवेल," असा खोचक टोला चित्रा वाघ यांनी लगावला आहे.