समृद्धीच्या चौथ्या टप्प्याचे ऑगस्ट२०२४ पर्यंत लोकार्पण

मुंबई, दि.२८: राज्यातील पहिला हायटेक महामार्ग हिंदुहृदयसम्राट बाळासाहेब ठाकरे समृद्धी महामार्ग ऑगस्ट-सप्टेंबर २०२४ पर्यंत मुंबईशी पूर्ण क्षमतेने जोडला जाईल. या महामार्गाच्या मुंबईशी जोडणाऱ्या चौथ्या टप्प्याचे काम अंतिम टप्प्यात आले आहे. याअंतर्गत इगतपुरी ते ठाणे दरम्यान ७६ किलोमीटर लांबीच्या महामार्गाचे बांधकाम सुरू आहे.

महामार्गाच्या चौथ्या टप्प्यात १६ पूल आणि ४ बोगदे बांधण्यात येत आहेत. एमएसआरडीसी च्या वरिष्ठ अधिकाऱ्यांनी दिलेल्या माहितीनुसार, समृद्धी महामार्गावर अंतिम टप्प्यातील काम ९५ टक्क्यांहून अधिक पूर्ण झाले आहे. हा महामार्ग इगतपुरी ते ठाण्यापर्यंत आणणे हे अत्यंत आव्हानात्मक होते. मात्र, भारतीय अभियांत्रिकी आविष्काराच्या मदतीने सर्व आव्हानांवर मात केली आहे. ७६ किमी. या मार्गावर १६ पूल आणि ४ बोगदे बांधले जाणार आहेत. यापैकी १५ पूल आणि ४ बोगद्यांचे बांधकाम पूर्ण झाले आहे. सद्यस्थिती खर्डीजवळ पुलाचे काम सुरू आहे. हा पूल सुमारे ८२ मीटर म्हणजेच २७ मजली इमारतीइतका उंच आहे. या महामार्गावरील पुलाचे कामही ९७ टक्के पूर्ण झाले आहे. ऑगस्टअखेर हा मार्ग वाहनांसाठी खुला करण्याचे नियोजन आहे.

हा महामार्ग सुरू झाल्याने मुंबई ते नागपूर हा प्रवास अवघ्या ७ ते ८ तासांत पूर्ण होणार आहे. मुंबई-नागपूर दरम्यान प्रवास करणाऱ्या प्रवाशांसोबतच मुंबईहून नाशिक आणि शिर्डीकडे जाणाऱ्या प्रवाशांनाही ते सोयीचे होणार आहे. सध्या मुंबईहून शिर्डीला जाण्यासाठी लोकांना सात ते आठ तास लागतात. समृद्धी महामार्गाच्या उभारणीमुळे हा प्रवास सुमारे ५ तासांत पूर्ण होणार आहे. समृद्धी महामार्ग मुंबईच्या जवळ आणण्यासाठी भिवंडी ते ठाणे दरम्यानच्या राष्ट्रीय महामार्गाच्या रस्त्याचेही रुंदीकरण करण्यात येत आहे.

राज्यातील सर्वाधिक लांबीच्या महामार्गाच्या विस्तारीकरणाचे काम पावसाळ्यानंतर सुरू करण्याची तयारी एमएसआरडीसीने केली आहे. समृद्धी महामार्ग राज्याच्या शेवटच्या मर्यादेपर्यंत वाढवण्यासाठी काही दिवसांपूर्वी आर्थिक निविदा उघडण्यात आल्या होत्या. नागपूर ते गोंदिया आणि गडचिरोली या महामार्गाचा विस्तार करण्यासाठी अनेक कंपन्यांनी आर्थिक निविदा पास केली आहे. येत्या काही दिवसांत निविदा वाटपाची प्रक्रिया पूर्ण होईल.