‘मुदतपूर्व’ची कमाल की कसोटी?

 

सुनक यांच्याकडे सर्वसाधारण निवडणूक बोलाविण्यासाठी डिसेंबरपर्यंतचा अवधी होता. परंतु, त्यांनी अपेक्षित तारखेच्या काही महिने आधीच म्हणजे जुलै महिन्यात निवडणूक जाहीर केली आहे. त्यांच्या या मुदतपूर्व निवडणुका घेण्याच्या निर्णयाला स्वकीयांकडूनच दुभंगलेला प्रतिसाद मिळाला. आता अर्थव्यवस्था आणि संरक्षणाच्या मुद्द्यावर लक्ष केंद्रित करत दोन्ही पक्षांनी प्रचार सुरू केला आहे. दरम्यान, ऋषी सुनक यांच्या सरकारने मजूर पक्षावर करवाढीचे नियोजन केल्याचा आणि जागतिक आव्हानांसाठी या पक्षाचे धोरणे अप्रस्तुत असल्याचा आरोप केला, ज्याचा मजूर पक्षाने कडाडून विरोध केला. वास्तविक, गेल्या 14 वर्षांतील आर्थिक गैरव्यवस्थापनासाठी मजूर पक्षातील नेेते हे हुजूर पक्षाला सर्वस्वी दोष देतात.निवडणूक प्रक्रिया आणि मतदानाविषयी पाहिले, तर हा युनायटेड किंग्डम हा देश एकूण 650 मतदारसंघांमध्ये विभागला गेला आहे. प्रत्येक मतदारसंघात मतदार स्थानिक उमेदवार निवडतात, जो नंतर आपल्या कर्तृत्वावर संसदेत जागा मिळवू शकेल.

मतदारांना त्यांच्या बॅलेट पेपरवर एक उमेदवार निवडायचा असतो आणि सर्वाधिक मते मिळालेला उमेदवार विजयी होतो. उमेदवार सामान्यतः मोठ्या राजकीय पक्षाचे प्रतिनिधित्व करतात. 326 हा बहुमताचा जादुई आकडा. ही सीमा ओलांडणार्‍या पक्षाचा नेताच पुढे सरकार बनवू शकतो आणि पंतप्रधान होऊ शकतो. जवळपास 50 दशलक्ष ब्रिटनचे मतदार मतदानासाठी पात्र असतील. येथील स्थानिक वेळेनुसार सकाळी 7 ते रात्री 10 वाजेपर्यंत मतदान केंद्रांवर मतदान होते. संपूर्ण युकेमधील मतदार ‘हाऊस ऑफ कॉमन्स’च्या सर्व 650 सदस्यांना पाच वर्षांच्या कालावधीसाठी निवडतील. ‘कॉमन्स’मध्ये बहुमत असलेला पक्ष, एकटा किंवा युतीने, पुढचे सरकार स्थापन करेल, त्याचा नेता पंतप्रधान होईल.