योगींचा राजदंड

साधारणपणे वर्षभरापूर्वीची गोष्ट. उत्तर प्रदेशच्या विधानसभेत राज्यातील कायदा आणि सुव्यवस्थेविषयी माफिया आतिक अहमद याला केंद्रस्थानी ठेवून, चर्चा सुरू होती. विरोधी पक्षनेते आणि समाजवादी पक्षाचे नेते अखिलेश यादव यांनी मुख्यमंत्री योगी आदित्यनाथ यांना प्रश्न विचारून, एक खोचक टिप्पणी केली. अर्थात, मुख्यमंत्री योगी आदित्यनाथ यांनीदेखील ती टिप्पणी तेवढ्याच आक्रमकपणे परतावून लावली आणि अगदी ठामपणे ते म्हणाले की, “समाजवादी पक्ष हा प्रोफेशनल माफियांचा आश्रयदाता नेहमी राहिला आहे. मात्र, आमचे सरकार कोणत्याही माफियाला संरक्षण देणारे नसून, राज्यातील एक-एक माफियाचा हिशेब केल्याशिवाय राहणार नाही.” यावेळी योगी आदित्यनाथ यांनी वापरलेला ‘माफिया को मिट्टी में मिला देंगे’ हा शब्द चांगलाच गाजला होता आणि आजही लोक तो शब्द विसरलेले नाहीत. त्याचे कारण म्हणजे, उत्तर प्रदेशात गेल्या आठ वर्षांमध्ये असे अनेक माफिया योगी सरकारने धुळीस मिळवले आहेत. नुकत्याच मुख्तार अन्सारी या माफियाच्या झालेल्या नैसर्गिक मृत्यूमुळे योगी आदित्यनाथ यांचे नेतृत्व पुन्हा चर्चेत आले आहे. कारण, मुख्तार अन्सारीचा मृत्यू जरी नैसर्गिक असला, तरीदेखील त्याच्या गुन्ह्यांच्या सर्व फाईल्स काढून, योगी सरकारने एकेकाळच्या या बलाढ्य माफियास शब्दशः गुडघ्यावर आणले होते.

त्यापैकी अतिक अहमद आणि मुख्तार अन्सारी या माफियांची दहशत अतिशय भयानक होती. सप आणि बसप या दोन्ही पक्षांनी निवडणूक जिंकण्यासाठी अतिक आणि अन्सारी यांचा वापर केला होता. मुख्तार अन्सारी हा १९९५ ते २०२२ सालापर्यंत मऊ येथून आमदार होता, तर अतिक अहमद खासदारही झाला होता. विशेष म्हणजे, मुख्तारवर ६५ तर अतिकवर १०० पेक्षा जास्त गुन्हे दाखल होते. धक्कादायक बाब म्हणजे, उत्तर प्रदेशात २००५ साली झालेल्या तब्बल आठ राजकीय हत्यांचा आरोप मुख्तार आणि अतिकवर होता. राज्यात जानेवारी २००५ मध्ये बसप आमदार राजू पाल यांची हत्या झाली होती, त्यानंतर ठरावीक अंतराने अशा हत्यांचे सत्रच सुरू झाले होते. त्याचप्रमाणे भाजप आमदार कृष्णानंद राय यांच्यावर तर ४०० ते ५०० राऊंडचे फायरिंग झाले होते. मुख्तार अन्सारीने घडवलेल्या, या हत्येमुळे संपूर्ण राज्यात खळबळ माजली होती.

राज्याची ही स्थिती बदलण्यास प्रारंभ झाला २०१६ सालापासून. राज्यात भाजपला बहुमत मिळाले आणि योगी आदित्यनाथ मुख्यमंत्री झाले. त्यांनी राज्यातील कायदा आणि सुव्यवस्था सुधरविण्यासाठी माफियाराज संपविण्याचा चंग बांधला. कारण, माफियाराज संपुष्टात आल्याशिवाय राज्याचा आर्थिक विकास होणे शक्य नव्हते. त्यामुळे त्यांनी एकीकडे माफिया आणि बाहुबलींनी बेकायदेशीरपणे मिळवलेल्या प्रचंड संपत्तीवर बुलडोझर फिरवण्यास सुरुवात केली, तर दुसरीकडे अट्टल गुन्हेगारांचा हिशेब होऊ लागला. त्यामध्ये अगदी एन्काऊंटरही व्हायला लागले. योगी सरकारच्या कार्यकाळात पोलीसही कार्यक्षम झाले आहेत. त्यामुळे राज्यातील माफियांपैकी आतापर्यंत २५ माफिया आणि त्यांच्या ४४ साथीदारांना म्हणजेच एकूण ६९ जणांना ५४ प्रकरणांमध्ये शिक्षा झाली आहे. यातील दोन माफियांना फाशीची शिक्षा झाली आहे. मुख्यमंत्री योगी आदित्यनाथ यांच्या सूचनेवरून स्थापन झालेल्या, उत्तर प्रदेश पोलिसांच्या स्पेशल टास्क फोर्सने (एसटीएफ) एकापाठोपाठ एक मोठी कारवाई करून, माफियांचे साम्राज्य उद्ध्वस्त करण्यास प्रारंभ केला आहे.