‘स्वरगंधर्व सुधीर फडके’; चरित्रपटाच्या माध्यमातून होणार सुरेल संस्कार

या चित्रपटात ललिताबाई सुधीर फडके यांची व्यक्तिरेखा साकारणारी अभिनेत्री मृण्मयी देशपांडे हिने “ते स्केचबूक पाहिले देखील नव्हते,” असे ती म्हणाली. मला केवळ ललिताबाईंचा फोटो दाखवला होता. आणि मला सांगण्यात आले की, तुझ्यात आणि ललितबाईंच्या दिसण्यात साम्य आहे. दुसरी महत्त्वाची गोष्ट म्हणजे, दिग्दर्शकांनी आम्हाला सांगितले होते, जरी चरित्रपट असला, तरी कुठल्याही प्रकारची नक्कल करायची नाही. कारण, त्या व्यक्तीसारखे दिसणे आणि असणे हे फार महत्त्वाचे आहे,” असे मृण्मयी म्हणाली.

बाबूजींची भूमिका साकारण्यापूर्वी एक अभिनेता म्हणून अभ्यास कसा केला, हे सांगताना सुनील बर्वे म्हणाले, “बाबूजींबद्दल अनेकांनी त्यांची मते लिहून ठेवली आहेत. तर, त्यांच्याविषयी अनेक दिग्गजांनी केलेल्या लिखाणातून, मी मुळात एक माणूस म्हणून बाबूजी कसे होते? त्यांचा स्वभाव कसा होता? त्यांची लोकांशी बोलण्याची शैली कशी होती, हे सगळे अभ्यासले,” असा पूर्वतयारीचा अनुभव त्यांनी सांगितला.

रा. स्व. संघाचे बाबूजींच्या जीवनातील महत्त्व सांगताना सुनील बर्वे म्हणाले, “बाबूजी मुंबईत आल्यापासूनच त्यांचा खडतर प्रवास सुरू झाला होता. गाणी गाऊन ते स्वत:चा उदरनिर्वाह करत होते. अशा कठीण प्रसंगात रा. स्व. संघाच्या अनेक स्वयंसेवकांनी त्यांना मदत केली होती, आणि स्वयंसेवकांच्या मदतीमुळे ते कलकत्त्यापर्यंत पोहोचले होते. बाबूजींना त्यांच्या जीवनातील पहिले गाणे मिळेपर्यंत संघानेच साथ दिली होती. याशिवाय, संघाची अनेक गाणी बाबूजींनी संगीतबद्ध केली होती. तसेच, चित्रपटात बाबूजी आणि रा. स्व. संघाचे आद्य सरसंघचालक प. पू. डॉ. केशव बळीराम हेडगेवार यांची भेट पाहायला मिळणार आहे. शिवाय, संघासाठी बाबूजींनी केलेले कार्यदेखील प्रेक्षकांना ‘याची देही याची डोळा’ अनुभवता येणार आहे,” असेदेखील बर्वे म्हणाले.

 

बाबूजी आणि ललिताबाईंच्या भूमिकेने काय दिले, हे सांगताना सुनील आणि मृण्मयी म्हणाले, “बाबूजींच्या गाण्यांनी आपल्यावर बालपणापासून संस्कार केले आहेत. या चित्रपटाच्या निमित्ताने आमच्यावर एक कलाकार म्हणूनही संस्कार झाले. पण, बाबूजींची व्यक्तिरेखा जगल्यानंतर संगीत क्षेत्रातील समर्पण, देशप्रेम अशा अनेक गोष्टी मी आत्मसात केल्या.” तर मृण्मयीने, “या चित्रपटाने मला पडद्यावर का होईना, पण फडके कुटुंबात सामील होण्याची संधी दिली त्याचा आनंद आहे,” असे म्हटले.