तुम्ही दूध पीता म्हणजे गोमांस खाता! मनेका गांधींच्या आरोपांना कॉ-ऑपरेटीव्ह सोसायटीनं काय उत्तर दिलं?

नवी दिल्ली : भाजप खासदार मनेका गांधी यांनी अमूलवर गंभीर आरोप केले असून, ते अमूलने फेटाळून लावले आहेत. सोशल मीडियावर पोस्ट केलेल्या एका व्हिडिओमध्ये, एका मुलाखतीदरम्यान मनेका गांधी म्हणतात की, अमूल शेतकऱ्यांना मदत करते यावर मी सहमत नाही. अमूल फक्त गायींचे पालनपोषण करत नाही तर त्यांची विक्री आणि त्यांना मारण्यात मदत करते. त्यामुळे अमूलवर अनेक गाईंच्या हत्येचा आरोप असल्याचे ही त्या म्हणाल्या. गांधी म्हणाल्या की, जैन समाजाची सर्वाधिक लोकसंख्या गुजरातमध्ये आहे, अमूलही गुजरातमध्ये आहे आणि सर्वाधिक गोहत्याही गुजरातमध्ये होतात.

 

दरम्यान अमूलने आपल्या निवेदनात स्पष्ट म्हटले आहे की, ही एक फेक न्यूज आहे, या व्हिडिओमध्ये अनेक निराधार दावे करण्यात आले आहेत जे चुकीचे आणि खोटे आहेत. अमूलने ७७ वर्षात अनेक पिढ्यांचे पालनपोषण केले आहे. भारत हा सर्वात मोठा दूध उत्पादक देश असल्याचा उल्लेख करून अमूल म्हणाले की, आपला देश डेअरी उद्योगात स्वावलंबी आहे.

 

सरतेशेवटी, अमूलने आपल्या निवेदनात हा संदेश नातेवाईक आणि मित्रांपर्यंत पोहोचवण्याची विनंती केली आहे आणि त्यांना खात्री दिली आहे की अमूल एक जबाबदार ब्रँड आहे आणि त्याचे पुरवठादार असणारे ३६ लाख शेतकरी त्यांच्या जनावरांवर प्रेम करतात, त्यांचे संरक्षण करतात आणि त्यांची काळजी घेतात. सहकारी संस्थेने कोणत्याही प्रश्नांच्या उत्तरासाठी १८००२५९३३३३ या क्रमांकावर कॉल करण्यास सांगितले आहे.