“हल्लीची तरुण पिढी नात्यात Convenience शोधते” – श्रेयस तळपदे

 

 

 

 

मुंबई : नात्याची परिभाषा काळाच्या ओघात नक्कीच बदलत जाते. आजच्या तरुण पिढीला कोणत्याही नात्यांबद्दल काय वाटतं यावर आपले मत मांडताना अभिनेता श्रेयस तळपदे (Shreyas Talpade) म्हणाला की, “आजची पिढी नात्यात स्वत:चा फायदा आणि सोय बघते”. दरम्यान, नात्यांवर आधारित ‘ही अनोखी गाठ’ हा श्रेयस तळपदे आणि गौरी इंगवळे ( Gauri Ingawale) यांचा नवा कोरा चित्रपट प्रेक्षकांच्या भेटीला आला आहे. या चित्रपटात अशा दोन व्यक्तींची लग्नगाठ बांधली गेली आहे ज्यांना कधी त्या नात्यात गुंतायचेच नव्हते. या चित्रपटाच्या निमित्तानेच ‘महाएमटीबी’शी बोलताना श्रेयसने नात्यांबद्दल भाष्य केले.

 

 

श्रेयस म्हणाला की, “आजची पिढी नात्यांना फार कन्विनियन्सने पाहते. या नात्यात माझा काही फायदा आहे का? किंवा मला या नात्यातून काय मिळणार आहे? या विचार आजची ठराविक पिढी करते. पण मी माझ्या भूतकाळात गेलो, तर आम्हाला असं सांगतिलं गेलं होतं, की जेव्हा तुम्ही प्रेमात पडाल तेव्हा मनात घंटी वाजेल. पण आता असं काही होत नाही. उलट हा विचार केला जातो की ती व्यक्ती मला समजून घेईल का? माझी कामं होतील का? माझ्या करिअरसाठी किती फायदेशीर हे नातं ठरेल? या सगळ्याचा सारासार विचार आजची पिढी करते. जे आम्ही करत नव्हतो”, असे नात्यांबद्दलचे महत्व आणि आजच्या पिढीचे विचार बेधडकपणे श्रेयसने मांडले.

 

 

 

श्रेयस तळपदे याने त्याच्या अभिनयाच्या काळात डोकावून पाहात आजच्या पिढीशी स्वत:शी तुलना केली. तो म्हणाला की, “माझ्या आणि आजच्या तरुण पिढीत एक महत्वाचा फरक मला जाणवतो तो असा की, ते त्यांच्या कामाप्रती फार एकाग्र आहेत. आणि त्याचवेळी त्यांना मार्केंटिंगचं महत्व देखील माहित आहे. कारण आम्ही एकांकिका, नाटक, मालिका आणि मग चित्रपट असा प्रवास केला आहे. आम्हाला कायम एक गोष्ट आमच्या वरिष्ठांकडून सांगितली गेली होती ती म्हणजे चांगलं काम करा तर चांगल्या भूमिका पदरी पडतील. पण मार्केटिंगचं योग्य ज्ञान आजच्या आधुनिक काळात असणं देखील तितकंच महत्वाचं आहे,” असे म्हणत श्रेयसने आजच्या तरुण पिढीचे कौतुक देखील केले.