द्रविडी राजकारणाला भाजपचे आव्हान

भाजपच्या तेव्हाच्या जुन्या म्हणजे ‘११, अशोक रोड’स्थित कार्यालयामध्ये नव्वदच्या दशकात विजय मिळवून अटल बिहारी वाजपेयी प्रवेश करत असतानाच, नरेंद्र मोदी त्यांना भेटायला येतात आणि त्यांना पाहताच वाजपेयी अगदी कौतुकाने मोदींना मिठी मारून त्यांना शाबासकी देत असतानाचा हा प्रसंग नेहमीच समाजमाध्यमांवर ट्रेंडिंग असतो. ज्येष्ठ नेते भाजपच्या तरुण नेतृत्वास कशी वागणूक देतात, हे सांगण्यासाठी भाजप समर्थकांकडून या प्रसंगाचा दाखला वेळोवेळी दिला जात असतो, तर या व्हिडिओचा संदर्भ देण्याचे कारण म्हणजे, गेल्या दोन दिवसांमध्ये ट्विटर, फेसबुक, इन्स्टाग्राम या समाजमाध्यमांमध्ये असाच एक व्हिडिओ वेगाने ‘व्हायरल’ झाला होता. तो व्हिडिओ होता तामिळनाडूमधल्या तिरुपूरमध्ये झालेल्या पंतप्रधान नरेंद्र मोदी यांच्या भव्य सभेचा. तामिळनाडू भाजपचे प्रदेशाध्यक्ष आणि भारतीय पोलीस सेवेतील माजी अधिकारी अण्णामलाई कुप्पूसामी यांनी काढलेल्या ‘एन मन, एम मक्कल’ या यात्रेच्या समारोपासाठी आयोजित कार्यक्रमास पंतप्रधान मोदी यांनी संबोधित केले. या सभेमध्ये प्रदेशाध्यक्ष अण्णामलाई यांचे भाषण झाल्यानंतर पंतप्रधानांनी त्यांच्या पाठीवर कौतुकाची थाप मारली आणि त्यांना शाबासकीही दिली. कारण, लोकसभा निवडणुकीच्या पार्श्वभूमीवर तामिळनाडूमध्ये एवढी प्रचंड मोठी जाहीर सभा आयोजित करण्याचे शिवधनुष्य अण्णामलाई यांनी लीलया पेलल्याचे कौतुक पंतप्रधानांनी केले. कारण, भाजप औषधालाही नसलेल्या या राज्यामध्ये अण्णामलाई ज्या तडफेने भाजप रुजवण्यासाठी काम करत आहेत, ते खरोखरच कौतुकास्पद!

 

अण्णामलाई यांच्या स्वच्छ प्रतिमेमुळेदेखील त्यांच्याविषयी राज्यात आकर्षण वाढत आहे. भारतीय पोलीस सेवेमध्ये कर्नाटकात कार्यरत असतानाही त्यांची निडर कार्यशैली प्रसिद्ध होती. त्यानंतर तामिळनाडूच्या राजकारणात सक्रिय झाल्यानंतर द्रमुक सरकारवर ’डीएमके फाईल्स’ या नावाने भ्रष्टाचाराचे अनेक आरोप केले. तामिळनाडूच्या निवडणुकीत द्रविडी पक्ष करत असलेल्या गैरप्रकारांविरोधात आणि द्रमुकच्या घराणेशाहीविरोधात ते अतिशय स्पष्टपणे बोलतात. या पार्श्वभूमीवर लोकसभा निवडणुकीमध्ये सर्वेक्षणाप्रमाणे भाजपने मतांच्या टक्केवारीचा १५ टक्क्यांचा टप्पा खरोखरच पार केला, तर राज्याच्या विधानसभा निवडणुकीमध्ये द्रमुकला तगडे आव्हान उभे करण्याची भाजपची क्षमता नक्कीच असेल.

 

लोकसभा निवडणुकीच्या तोंडावर राज्यसभेसाठी झालेल्या निवडणुकीमध्ये हिमाचल प्रदेशात सत्ताधारी काँग्रेसचे अभिषेक मनू सिंघवी हे पराभूत झाले. सर्वोच्चन्यायालयातील नामवंत वकील असलेल्या सिंघवी यांच्या पराभवामुळे राज्याची सत्ता गमाविण्याची भीती काँग्रेसला सतावू लागली आहे. सध्या जरी विश्वासदर्शक ठराव जिंकून आणि भाजपच्या डझनभर आमदारांवर अपात्रतेची कारवाई सुरू करून मुख्यमंत्री सुक्खू सरकारने पुढील तीन महिन्यांसाठी तरी सत्ता वाचेल, अशी तजवीज केली आहे.मात्र, हिमाचल प्रदेशातील उदाहरणाद्वारे पुन्हा एकदा काँग्रेस नेतृत्वाच्या मर्यादा स्पष्ट झाल्या आहेत. कारण, मुख्यमंत्रिपदी सुक्खू यांची निवड झाल्यापासूनच पक्षांतर्गत विरोधात सुरुवात झाली होती. काँग्रेसचे एकेकाळचे ज्येष्ठ नेते आणि माजी मुख्यमंत्री विरभद्र सिंह यांची प्रतिमा उभारण्यास जागा न देण्यावरून विरभद्र याचे पुत्र आणि मंत्री विक्रमादित्य यांच्यासह अनेक आमदार सुक्खू यांच्यावर नाराज होते. त्यांनी आपली नाराजी वेळोवेळी काँग्रेस पक्षश्रेष्ठींकडे बोलूनही दाखवली होती. राज्यात सर्वकाही आलबेल नसल्याची खात्री असल्यानेच काँग्रेसने सोनिया गांधी यांना हिमाचल प्रदेशऐवजी राजस्थानमधून राज्यसभेवर पाठवले असल्याचे आता स्पष्ट झाले आहे. त्यामुळे काँग्रेस पक्ष पक्षांतर्गत तिढे सोडविण्यासाठी एवढे पराभव पाहूनही गंभीर नसल्याचे पुन्हा एकदा स्पष्ट झाले आहे.