आलो शरण तुला भगवंता...

जुन्या काळात देवघरात नंदादीप असायचे, जे दिवसभर तेवत राहायचे. खंड न पडता, दिवा देवघरात तेवत राहावा, म्हणून नंदादीपाला विशेष प्राधान्य दिले जायचे. असाच काहीसा प्रकार ज्येष्ठ पत्रकार राजदीप सरदेसाई यांचा. एकीकडे नंदादीप अखंड तेवत राहून, घरामध्ये सकारात्मकता पसरविण्याचे काम करतो आणि दुसरीकडे ‘राजदीप’ मात्र दिवसरात्र भाजप विरोध करून, सगळीकडे नकारात्मकता पसरविण्याचे काम करतात. ही नकारात्मकता पसरविण्यासाठी, खास बक्षिसेदेखील दिली जातात आणि त्या बक्षिसाच्या लाभार्थी ठरल्या आहेत, त्यांच्या पत्नी सागरिका घोष. नुकतेच तृणमूल काँग्रेसने त्यांना राज्यसभेसाठी तिकीट दिले. राजदीप अनेकदा सोशल मीडिया आणि वृत्तवाहिनीच्या माध्यमातून भाजप आणि पंतप्रधान नरेंद्र मोदी यांच्या विरोधात अपप्रचार करण्यासाठी, देशभरात ओळखले जातात. या बाबतीत पती-पत्नी दोघांचेही मत समान.राजदीप हे ’रसगुल्ला पत्रकारिते’साठीही ओळखले जातात. ज्यासाठी त्यांना बहुधा त्यांची पत्नी राज्यसभा खासदार झाल्याच्या रुपाने बक्षीस मिळाले आहे. राजदीप यांनी एका प्रश्नाच्या उत्तरात कबूलही केले होते की, “जर मी ममता बॅनर्जींना त्यांच्या राज्यात होत असलेल्या, हिंसाचारावर कठोर प्रश्न विचारले असते, तर त्यांना रसगुल्ला मिळाला नसता.” राजदीप यांनी पश्चिम बंगालमधील निवडणुकीतील हिंसाचाराच्या संदर्भात मुख्यमंत्री ममता बॅनर्जी यांना कोणताही प्रश्न विचारला नाही; कारण ते ’चाय पे चर्चा’ करण्यासाठी गेले होते आणि त्यांनी प्रश्न विचारला असता, तर त्यांना रसगुल्ला मिळाला नसता.हिंदू कुटुंबे आणि मुस्लीम जावई यांच्यातील जिहादला ‘मानसिक वेडेपणा’ बनवून, जबरदस्तीने धर्मांतर करण्याच्या धमकीचा अतिशय सोयीस्करपणे विपर्यास सागरिका यांनी केला होता. घोष यांनी घृणास्पद गुन्ह्यातील पीडितांना गप्प केले आणि पीडितांनाच दोष देण्यास सुरुवात केली. ज्या स्त्रियांना अशा भीषण परिस्थितीला सामोरे जावे लागते, ते ’मुस्लीम जावई’च्या मानसिक वेडाचे परिणाम आहे, असे त्यांचे मत. एकूणच हिंदूविरोध दोघांमध्ये कुटूनकुटून भरला असून, ज्याची पोचपावती सागरिका यांना राज्यसभेच्या तिकिटाच्या रुपात मिळाली. आपली वाहवा करणार्‍या आणि हिंसेविरोधात प्रश्न न विचारणार्‍यांवर ममता अशी राज्यसभेची माया दाखवत असतील, तर बंगाली जनताही येत्या काळात ममतांवरील खरी माया दाखवून देतील, हे निश्चित!