हंगाम नसताना कुडाळमध्ये हवेवर तरंगणाऱ्या 'मलबार ग्लायडिंग फ्राॅग'चे दुर्मीळ दर्शन; रुग्णालयात सापडला बेडूक

'मलबार ग्लायडिंग फ्राॅग' हा वृक्षवासी असल्याने त्याची प्रजननाची क्रिया झाडावरच होते. समागमावेळी बेडकाची जोडी एखादे डबके किंवा वाहणाऱ्या ओढ्यावर असणाऱ्या झाडाच्या फांदीवर आसरा घेते. जेणेकरुन जन्मास येणारे बेडूकमासे (टॅडपाॅल्स) खाली पाण्याच्या स्त्रोतात पडतील. जोडीने समागमाची प्रक्रिया सुरू केल्यावर मादी अंड्यांबरोबर एक चिकट स्त्राव सोडते आणि मागच्या पायाने तो चोळायला सुरुवात करते. अशावेळी नर आपले शुक्राणू अंड्यावर सोडतो आणि दोघे मिळून पायाच्या हालचालीने फेस तयार करतात. याला 'फोम नेस्ट' म्हणतात. या फेसाळलेल्या घरट्यात साधारण ८९ ते २०६ संख्येने अंडी असतात. मादी आपले हे घरटे पानांच्या मदतीने झाकून घेते. त्यानंतर नराने सोडलेल्या शुक्राणूमुळे अंडी फलित होण्यास सुरुवात होते. काही दिवसांनी या घरट्यामध्ये बेडूकमाशांची वाढ झालेली दिसते. हे बेडूकमासे घरट्यामधून खाली पाण्यात उड्या मारतात. पाण्यात हळूहळू त्यांची वाढ होते. त्यांची शेपूट नाहीशी होऊन त्यांना आकार येण्यास सुरुवात होते. त्यांना 'फ्राॅगलेट' म्हणतात. हे 'फ्राॅगलेट' डबक्याजवळ असणाऱ्या झाडांच्या पानांवर निपचिप पहुडलेले दिसतात.