शिवसेना खासदार रवींद्र वायकर यांच्या गाडीचा अपघात!

30-Dec-2024

Total Views | 132

मुंबई : (MP Ravindra Waikar) शिवसेना खासदार रवींद्र वायकर यांच्या गाडीचा किरकोळ अपघात झाल्याची माहिती समोर येत आहे. जोगेश्वरीच्या एसआरपीएफ कॅम्पच्या प्रवेशद्वाराजवळ अपघात झाल्याची माहिती आहे. अपघातावेळी खासदार रवींद्र वायकर हे गाडीतच असल्याचे समजते आहे.

जोगेश्वरी येथे मुंबई पश्चिम द्रुतगती महामार्गावर रविवारी २९ डिसेंबरला रात्री ११ वाजण्याच्या सुमारास खासदार रवींद्र वायकर यांच्या गाडीला एका ट्रकचालकाने धडक दिली. जोगेश्वरी परिसरातील एसआरपीएफ कॅम्पच्या प्रवेशद्वाराजवळच ही घटना घडली आहे. तसेच या अपघातात कोणालाही इजा झालेली नसून गाडीचे किरकोळ नुकसान झाले आहे. या प्रकरणी खासदार रवींद्र वायकर यांनी वनराई पोलीस ठाण्यात तक्रार नोंदवली आहे.

संबंधित घटनेची माहिती मिळताच वनराई पोलीसांनी घटनास्थळी जाऊन ट्रक आणि ट्रकचालकाला ताब्यात घेतले आहे. वळण घेत असताना एक बाईक आडवी आल्याने ट्रक वायकरांच्या गाडीला धडकला असल्याचे ट्रकचालकाने चौकशीदरम्यान सांगितले आहे.