सवय म्हणावी की खोड?

जग इकडचे तिकडचे होवो, मात्र राज्यातील एका विश्वप्रवक्त्याला प्रत्येक गोष्टीवर आपले मत व्यक्त करणे अतिगरजेचे वाटते. ही सवय म्हणावी की खोड, ते सांगता येत नसले, तरी ती काही केल्या जात नाही, हे मात्र तितकेच खरे. नुकतीच राज ठाकरे यांच्या भाच्याच्या लग्नात उबाठा गटाचे प्रमुख उद्धव ठाकरे आणि मनसेचे अध्यक्ष राज ठाकरे एकत्र आले. यावेळी दोघांमध्ये जुजबी चर्चा झाली. मात्र, चर्चा झाली इकडे अन् मिरच्या झोंबल्या त्या विश्वप्रवक्ते संजय राऊतांना. “जनतेचे दोन्ही भावंडांवर जीवापाड प्रेम आहे. दोघांचे पक्ष वेगळे आहेत. त्यांच्यात वैचारिक मतभेद आहेत. कुटुंब म्हणून मात्र आम्ही कायम एक आहोत. मात्र, राज ठाकरे यांचे अमित शाह, नरेंद्र मोदी आणि देवेंद्र फडणवीस हे आदर्श आहेत. आमच्या पक्षाचे तसे नाही. महाराष्ट्रावर अन्याय करणारे, आमचा पक्ष फोडणारे हे लोक आहेत.” त्यामुळे आम्ही त्यांच्यासोबत जाऊ शकत नसल्याचे म्हणत उबाठा गटाचे खा. संजय राऊत यांनी राज ठाकरे आणि उद्धव ठाकरे यांच्या भेटीवर भाष्य केले आहे. तसेच, राज ठाकरे दुर्दैवाने अशा लोकांची साथ देतात, असा टोमणाही राऊतांनी लगावला. पक्षाध्यक्षांकडून राऊतांनी त्याचेही उत्तम प्रशिक्षण घेतलेले आहे, नव्हे त्यांनी एकदा तर सांगितलेही आहे की, चक्क उद्धव ठाकरेंकडून रशियाचे राष्ट्रपती पुतीन मार्गदर्शन घेतात. त्यामुळे राऊतांच्या बडबडीवर आणि विश्वासार्हतेवर फार काय ते बोलावे... राऊतांनी आपल्या शेवटच्या खासदारकीत का होईना, जमेल तेवढी लोकांची कामे करावी. ज्यांना पन्नास खोके म्हणून हिणवले, त्यांच्याच जीवावर ते खासदार झाले होते. अगदी काठावर जिंकले, नाहीतर पराभव अटळ होताच. मात्र, दिवस आणि वेळ पूर्णतः बदललेली आहे. आता राऊतांना राज्यसभेची पायरी चढायला उबाठा गटाकडे आमदारच शिल्लक नाही. खासदारकी दूर, स्वतः उद्धव ठाकरे यांचे आमदार होणे आता दुरापास्त दिसते. विरोधी पक्षनेते पद मिळेल इतके आमदारही महाराष्ट्राच्या जनतेने यंदा निवडून दिले नाही. इतका लाजिरवाणा पराभव होऊनही, रोज राऊत अपशब्दांची लाखोली सत्ताधार्‍यांवर वाहत आहेत. मुख्यमंत्री देवेंद्र फडणवीस तर राऊतांना एका वाक्यातच प्रत्युत्तर देतात आणि ते म्हणजे कोण संजय राऊत? भविष्यात खासदारकी मिळणार नसल्यामुळे ते वाक्य लवकरच खरे ठरेल, हे मात्र नक्की...