वसई-विरार जिल्ह्यात भाजपसाठी ५ लाख सदस्य नोंदणीचे लक्ष्य

कल्याण : भारतीय जनता पक्षातर्फे आगामी काळात संपूर्ण भारतभर सदस्य ‘नोंदणी अभियान’ ( BJP Members ) राबविण्यात येणार आहे. त्यामध्ये वसई-विरार जिल्ह्यातून किमान पाच लाख सदस्य नोंदणीचे करण्याचे आवाहन भाजपच्या संघटन पर्व २०२४ सदस्य नोंदणी मोहिमेचे प्रदेश सहसंयोजक, माजी आमदार नरेंद्र पवार यांनी केले आहे. या सदस्य नोंदणी मोहिमेच्या पार्श्वभूमीवर नालासोपारा येथे झालेल्या वसई-विरार जिल्ह्याच्या प्राथमिक बैठकीत त्यांनी पाच लाख सदस्य नोंदणीचे लक्ष्य निर्धारित केले.

“येत्या काही महिन्यांमध्ये महापालिकांच्या सार्वत्रिक निवडणुकीचे बिगुल वाजणार आहे. आधी लोकसभा निवडणुकांतील विजय, त्यानंतर नुकत्याच झालेल्या विधानसभा निवडणुकीतील निर्भेळ यश पाहता येणार्‍या महापालिका निवडणुकांमध्येही भारतीय जनता पक्षाची अशीच विजयी घोडदौड कायम राहणे आवश्यक आहे,” असे मत नरेंद्र पवार यांनी यावेळी व्यक्त केले.

या पार्श्वभूमीवर राज्यात प्रदेश भाजपतर्फे संघटन पर्व-२०२४ या सदस्य नोंदणी मोहिमेला प्रारंभ होत आहे. या मोहिमेमध्ये भाजपच्या वसई-विरार जिल्ह्यातून किमान पाच लाख सदस्य नोंदणीचे लक्ष्य गाठण्याचे आवाहन नरेंद्र पवार यांनी या बैठकीत केले. तर विधानसभा निवडणुकीतील भाजप आणि महायुतीच्या घवघवीत विजयाबद्दल भाजपच्या वसई-विरार जिल्हा पदाधिकारी आणि कार्यकर्त्यांकडून पवार यांचा अभिनंदनपर सत्कार करण्यात आला.

विधानसभा निवडणुकीत माजी आ. नरेंद्र पवार यांच्यावर कल्याण पश्चिम आणि उल्हासनगर या दोन विधानसभांची जबाबदारी सोपवण्यात आली होती. नरेंद्र पवार यांनी उत्कृष्ट संघटन कौशल्य आणि दांडग्या जनसंपर्काच्या जोरावर, या दोन्ही ठिकाणी महायुतीच्या उमेदवारांच्या विजयामध्ये मोठी भूमिका बजावली. त्याची दखल घेऊन भाजप पक्षश्रेष्ठींकडून नरेंद्र पवार यांची संघटन पर्व २०२४ या सदस्य नोंदणी मोहिमेच्या प्रदेश सहसंयोजकपदी नियुक्ती केली आहे. ज्याअंतर्गत त्यांच्याकडे ठाणे विभागाच्या नऊ जिल्ह्यांतील भाजप सदस्य नोंदणीची जबाबदारी सोपविण्यात आली आहे. त्याचाच एक भाग म्हणून नालासोपारा येथे त्यांच्या मार्गदर्शनाखाली वसई-विरार जिल्ह्याची बैठक संपन्न झाली.

नालासोपारा विधानसभा आमदार राजन नाईक, वसई विधानसभा आमदार स्नेहा दुबे यांच्यासह भाजप प्रदेश सचिव व जिल्हा प्रभारी राणी द्विवेदी, ठाणे विभाग संघटनमंत्री हेमंत म्हात्रे, वसई-विरार जिल्हा अध्यक्ष महेंद्र पाटील, वसई विधानसभा निवडणूक प्रमुख मनोज पाटील, युवा मोर्चा प्रदेश सचिव अशोक शेळके, सरचिटणीस प्रज्ञा पाटील, अभय कक्कड, विश्वास सावंत, जे. पी. सिंह तसेच प्रदेश पदाधिकारी, जिल्हा पदाधिकारी, जिल्हा मोर्चा आघाडी अध्यक्ष सरचिटणीस, मंडळ अध्यक्ष व सरचिटणीस यांच्यासह भाजप पदाधिकारी आणि मोठ्या संख्येने कार्यकर्ते उपस्थित होते.