‘फेक नॅरेटिव्ह’ला ‘ब्रेक’ लावण्यासाठी पिंजून काढल्या ७८ विधानसभा

वर्तमानपत्र विक्रेता ते आमदार, असा माझा राजकीय प्रवास राहिला आहे. राष्ट्रीय स्वयंसेवक संघाच्या संस्कारानुसार काम करीत आयुष्यात विविध टप्पे गाठले. २०१० सालापासून भाजपमध्ये सक्रीय झालो. माझे नेते देवेंद्र फडणवीस आणि प्रदेशाध्यक्ष चंद्रशेखर बावनकुळे यांनी विधानपरिषदेत काम करण्याची संधी दिली. मी ज्या समाजातून येतो, त्या मातंग समाजाला आजवर विधानपरिषद किंवा राज्यसभेत प्रतिनिधित्व मिळाले नव्हते. इतिहासात पहिल्यांदा माझ्या निमित्ताने मातंग समाजाला प्रतिनिधित्व मिळाले. भाजपच्या या कृतीची केवळ सत्ताधारीच नव्हे, तर काँग्रेस आणि शरद पवार पक्षातील नेत्यांनीही प्रशंसा केली. ज्यादिवशी मी शपथ घेतली, त्यादिवशी संपूर्ण राज्यभरात आनंदोत्सव साजरा करण्यात आला. भाजपने मला दिलेली आमदारकी हा मातंग समाजाचा गौरव आहे.

मी आमदारकीची शपथ घेतल्यानंतर पक्ष नेतृत्त्वाने मला समाजात जाऊन संविधान बदलाच्या ‘खोट्या नॅरेटिव्ह’ची पोलखोल करण्याची सूचना केली होती. त्यानुसार मी बहुजन संवाद यात्रेची आखणी केली. २२ पेक्षा अधिक जिल्हे, ७८ मतदारसंघ मी पिंजून काढले. ज्या जिल्ह्यांमध्ये अनुसूचित जातींचा प्रभाव आहे, तेथील छोट्या छोट्या वस्त्यांमध्ये जाऊन संवाद साधणे, त्यांच्या अडचणी जाणून घेण्यास मी सुरुवात केली. त्याला सर्वसामान्यांचा जो प्रतिसाद मिळाला, ते पाहून मीही अचंबित झालो. दोन महिन्यांत ३० हजार किमीहून अधिक माझा प्रवास झाला. काँग्रेस आणि महाविकास आघाडीने लोकांना भ्रमित केले होते, भाजप संविधान बदलेल, असा खोटा प्रचार केला होता. मी लोकांसमोर वस्तुस्थिती मांडली. काँग्रेसने डॉ. बाबासाहेब आंबेडकर यांची वेळोवेळी केलेली अवहेलना मुद्द्यांसहित पटवून दिली. त्यामुळे विधानसभा निवडणुकीत लोकांनी सजग होत मतदान केले.

मला फार कमी वेळ या महामंडळाचे अध्यक्षपद मिळाले. या अल्प काळात मी ‘अण्णाभाऊ साठे आर्थिक विकास महामंडळा’चा संपूर्ण कारभार ऑनलाईन आणला. त्याआधी अर्ज घेण्यासाठीही भ्रष्टाचार व्हायचा. ३० रुपयांच्या अर्जासाठी तीन हजार रुपये घेतले जात होते. ऑनलाईनमुळे हे प्रकार बंद झाले. दिल्लीतून सहकार्य मिळायचे नाही, ते माझ्या काळात पाठपुरावा करून सुरू केले. येत्या काळात या महामंडळासाठी एक हजार कोटींचा निधी मिळवून देण्यासाठी माझा प्रयत्न असेल. ‘बार्टी’च्या धर्तीवर ‘आर्टी’ अर्थात ‘अण्णाभाऊ साठे शिक्षण आणि प्रशिक्षण संस्थे’ची निर्मिती उपमुख्यमंत्री देवेंद्र फडणवीस यांच्या माध्यमातून आम्हाला करता आली. माझ्या आमदारकीच्या कारकीर्दीत सोनेरी अक्षराने लिहावे, असे हे काम आहे.

माझ्या संवाद यात्रेदरम्यान ‘आर्टी’बद्दल जनजागृती करण्यावर भर दिला. ही संस्था मातंग समाजासाठी एक शैक्षणिक हब म्हणून पुढे यावी, यासाठी आमचे प्रयत्न आहेत. प्रत्येक जिल्ह्यातून किमान ५० मुले प्रशासकीय सेवेत जाण्यासाठी तयार करावीत, असा आमचा हेतू आहे. त्यादृष्टीने मी प्रचार-प्रसार केला. माझ्या सहा वर्षांच्या आमदारकीच्या कार्यकाळात ‘आर्टी’च्या माध्यमातून किमान ६० आयएएस अधिकारी व्हावेत, असा दृढनिश्चय मी केला आहे.