महापालिकेसाठी उबाठाला टक्कर देणार! एकनाथ शिंदेंनी बोलावली महत्वाची बैठक

  

मुंबई : (Eknath Shinde) विधानसभा निवडणुकीतील यशानंतर महायुतीनं आगामी बृहन्मुंबई महानगरपालिका निवडणुकीवर लक्ष्य केंद्रित केले आहे. या पार्श्वभूमीवर उपमुख्यमंत्री एकनाथ शिंदे यांच्या उपस्थितीत शिवसेनेच्या मुंबईतील सर्व खासदार, आमदार आणि प्रमुख पदाधिकाऱ्यांची विशेष बैठक गुरुवार दि. १२ डिसेंबर रोजी पक्षाचे नेते दीपक केसरकर यांच्या मुंबईतील शासकीय निवासस्थानी रामटेक बंगल्यावर पार पडली.

 

बैठकीनंतर माध्यमांशी बोलताना उपमुख्यमंत्री एकनाथ शिंदे म्हणाले, "आम्हाला सर्व मुंबईकरांचे स्वप्न असलेली मुंबई विकसित करायची आहे. ही अत्यंत महत्त्वाची बैठक मुंबई महापालिका निवडणुकीबाबत होती. आमच्या सरकारने गेल्या अडीच वर्षात केलेल्या सर्व कामांचा थेट फायदा राज्यातील जनतेला होणार आहे. या निवडणुकांसाठी महायुतीने पूर्ण तयारी केली आहे. तमाम मुंबईकरांचे स्वप्न असलेली मुंबई आम्ही घडवणार आहोत. मुंबईकरांसाठी आम्ही कोस्टल रोडचे काम केले. 'हिंदूह्रदयसम्राट बाळासाहेब ठाकरे आपला दवाखाना' सुरू केला. यासह आणखी अनेक प्रकल्प आहेत. हे सर्व महानगरपालिकेचे प्रकल्प आहेत. याचा थेट मुंबईकरांना फायदा होत आहे".

 

मुंबई देशाची आर्थिक राजधानी आहेच. पण मुंबई देशाचे पॉवर हाऊस झाले पाहिजे, त्यासाठी मुंबई पालिकेत सुद्धा महायुतीचेच सरकार असणं आवश्यक असल्याचे मत राज्याचे उपमुख्यमंत्री एकनाथ शिंदे यांनी व्यक्त केले. त्या तयारीसाठी नगरसेवक, आमदार, खासदार यांची बैठक घेऊन चर्चा करण्यात आल्याचे एकनाथ शिंदेंनी म्हणाले. या बैठकीविषयी त्यांनी एक्स वर पोस्ट करत माहिती दिली आहे.