मुंबई : ( Devendra Fadnavis )महाराष्ट्रात विधानसभा निवडणुकीचा रणसंग्राम सुरु झाला आहे. याच पार्श्वभूमीवर राज्यभरातील प्रचारसभांना जोरदार सुरुवात झाली आहे. अशातच राज्याचे उपमुख्यमंत्री देवेंद्र फडणवीस यांनी रविवारी दि. ११ नोव्हेंबर रोजी नागपूर दक्षिण पश्चिम या स्वतःच्या मतदारसंघामधील जाहीरसभेत बोलताना मी एकटाच असा मुख्यमंत्री आहे ज्याचं घर मुंबईत नाही. आजही माझं घर नागपूरमध्येच आहे आणि मला नागपूरकर असल्याचा गर्व आहे, असं म्हणत भावूक होत त्यांनी उपस्थितांना संबोधित केले.

 

 

"पाच वेळा सातत्याने तुम्ही आमदार म्हणून निवडून दिलंत. कधी विरोधी पक्षात काम केलं, तर कधी मुख्यमंत्री म्हणून काम केलं, विरोधी पक्षनेता म्हणून काम केलं, उपमुख्यमंत्री म्हणून ही काम केलं, मात्र या सर्व कारकिर्दीत मी महाराष्ट्रमध्ये आपल्या सर्वांची दक्षिण पश्चिम नागपूरच्या मतदारांची मान उंच ठेवली. कधीही तुम्हाला खाली पाहायला लावलं नाही. जो आमदार तुम्ही निवडून दिला त्या आमदाराने तुमचं नाव संपूर्ण महाराष्ट्रात नंबर वन वर आणून दाखवलं, हे मी गर्वाने बोलू शकतो. पंचवीस वर्ष विधानसभेत काम करतो आहे, त्याच्यापूर्वी नगरसेवक आणि महापौरही राहिलो. मात्र माझ्या या राजकीय वाटचालीत मी नेहमी समाजासाठी काम करण्याचं तत्व ठेवलं." असे ते म्हणाले.

 

"मी कधी स्वतःचा विचार केला नाही. देवेंद्र फडणवीसने कधीही स्वतःचं घर भरण्याचा विचार केला नाही. मी माझा उद्योग उभा केला नाही, माझ्या शिक्षण संस्था उभ्या केल्या नाही. माझं मेडिकल कॉलेज उभं केलं नाही. मी माझा कुठला व्यवसाय उभा केला नाही. पंचवीस वर्षांमध्ये केवळ समाजाकरिता काम करत राहिलो आणि म्हणूनच मला या गोष्टींचा आनंद आहे, महाराष्ट्रामध्ये आतापर्यंत वीस मुख्यमंत्री झाले या वीस मुख्यमंत्र्यांमध्ये मी एकटा मुख्यमंत्री असा आहे ज्याचं मुंबईमध्ये स्वतःचं घर नाही. आजही माझा घर नागपूर मध्येच आहे आणि मला नागपूरकर असल्याचा गर्व आहे.", असेही उपमुख्यमंत्री देवेंद्र फडणवीस म्हणाले.