शरद केळकर कसदार अभिनयाला, दमदार आवाजाची साथ

अभिनेते शरद केळकर यांनी मराठी, हिंदीसह दाक्षिणात्य चित्रपटांतही उल्लेखनीय भूमिका साकारल्या आहेत. अभिनय आधी की डबिंग आर्टिस्ट, असा प्रश्न शरद यांना विचारला असता ते म्हणाले, “आधी मी अभिनय क्षेत्राची निवड केली. कारण, त्यावेळी माझ्या आवाजाचा मी डबिंगसाठी उपयोग करू शकतो, याची माहिती मला नव्हती. कारण, लहानपणापासून मला अडखळत बोलण्याचा त्रास होता. त्यातून मी स्वत:ला बाहेर काढून पुढे अभिनयाच्या क्षेत्रात पाऊल टाकले. सुरुवातीपासून एक गोष्ट कायम माझ्या डोक्यात होती, ती म्हणजे ज्यावेळी आपण चित्रपट किंवा मालिकांमध्ये काम करतो, जिथे तुमच्याकडे डबिंग करण्यासाठी वेळ नसतो आणि घाईत डबिंग केले जाते. डबिंगची कला तुमच्याकडे अवगत नसेल, तर त्याचा त्रास होतो. तेव्हा मी विचार केला की, भविष्यात ज्यावेळी मी चित्रपटांत काम करेन, त्यावेळी मला डबिंग करावे लागेल आणि सर्वसाधारणपणे डबिंग करताना तुम्ही तुमचे काम अधिक चांगले करू शकता किंवा बिघडवूदेखील शकता. त्यामुळे स्वत:ला डबिंगची कला अवगत असावी म्हणून शिकण्यासाठी मी डबिंग शिकलो. त्यावेळी भविष्यात एस. एस. राजामौली मला संधी देतील आणि ‘बाहुबली’सारखा चित्रपट माझ्या जीवनात येईल, असे कधी स्वप्नातदेखीव वाटले नव्हते. त्यामुळे यातच करिअर करायचे या उद्देशाने नव्हे, तर ही कला एक अभिनेता म्हणून मी शिकावीशी असे वाटल्याने मी डबिंग शिकलो, पण आज नक्कीच त्या कलेचे सोने झाले आहे, असे वाटते.”

 

यावेळी एक किस्सा सांगताना शरद केळकर म्हणाले की, “ज्यावेळी मी डबिंग शिकण्यास सुरुवात केली तेव्हा, एका चित्रपटासाठी मी डबिंग केलं होतं. त्या चित्रपटासाठी तीन दिवस डब केल्यानंतर मला केवळ २० रुपये मिळाले होते. पण, मला त्या पैशांपेक्षा ती कला शिकण्याची आणि तो अनुभव घेण्याची इच्छा होती. प्रत्येक कलाकार मग तो कोणत्याही क्षेत्रात पारंगत असो, कामं सातत्याने केली की नवी कामं तुमच्याकडे येतात. हे कायम कोणत्याही क्षेत्रात आपले करिअर करणार्‍या कलाकारांनी लक्षात ठेवले पाहिजे. शिवाय कोणत्याही आव्हानांचा सामना करण्यासाठी सज्ज तत्पर राहणे गरजेचे आहे. त्यामुळे आपल्यातील कलागुणांची पारख करून जीवनात पुढे जावे आणि ध्येय गाठावे,” असा तरुण कलाकारांना सल्लादेखील शरद केळकर यांनी दिला.