सनातनविरोधी सनकींची टोळी

तामिळनाडूचे मुख्यमंत्री एम. के. स्टॅलिन यांचे सुपुत्र आणि द्रमुकचे नेते उदयनिधी स्टॅलिन हे त्यांच्या सनातन धर्माच्या उच्चाटनाविषयी केलेल्या विधानावर आजही ठाम आहेत. त्यांच्या विधानावरून कन्याकुमारीपासून ते काश्मीरपर्यंत वादंग झाल्यानंतरही त्यावरून माफी मागणे तर दूरच, उलट आपल्या उफराट्या विधानाची टिमकी मिरवण्यातच त्यांनी धन्यता मानली. आता उदयनिधीचा हा उद्दामपणा कमी होता की काय, म्हणून द्रमुकच्या आणखीन एका नेत्याचा व्हिडिओ नुकताच व्हायरल झाला. त्या व्हिडिओमध्ये द्रमुकचेच नेते आणि तामिळनाडूचे उच्चशिक्षण मंत्री के. पोनमुडी यांनी तर चक्क ‘इंडिया’ आघाडीची स्थापनाच मुळी सनातन धर्माविरोधात लढण्यासाठी झाली असल्याची अगदी ढळढळीत कबुली दिली. त्यामुळे ‘इंडिया’ आघाडीतील सनातनविरोधाचा हा छुपा अजेंडा जगजाहीर झाला असून, आगामी काळात अशीच आणखीन काही विधाने आघाडीतील अन्य नेत्यांच्या तोंडून बाहेर पडली, तर कदापि आश्चर्य वाटायला नको. खरं तर राजकीय पक्ष किंवा आघाडी म्हणून अन्य एखाद्या राजकीय पक्षाचा, युतीचा अथवा विचारधारेचा विरोध अगदी स्वाभाविक. परंतु, एखादा राजकीय पक्ष अशाप्रकारे थेट एका धर्मालाच संपुष्टात आणण्याच्या वल्गना करण्याचा हा कदाचित पहिलाच प्रकार. म्हणजे आजवर काँग्रेस आणि तत्सम विचारसरणीच्या पक्षांकडून ‘सेक्युलॅरिझम’च्या नावाखाली अल्पसंख्याकांचे लांगूलचालन उघड उघडपणे घडत होतेच. काँग्रेसचा हिंदूद्वेषही रामजन्मभूमी, रामसेतू आणि अशा कित्येक प्रसंगांतून लपून राहिलेला नव्हता. द्रमुकही त्याला अपवाद नाहीच. परंतु, यंदा आपण एकटे नाही, तर झुंडीत आहोत, म्हटल्यावर या चलाख कोल्ह्यांनी गळे काढायला सुरुवात केली. उदयनिधीच्या विधानाचा ‘इंडिया’ आघाडीतील दोन-तीन पक्षांनी तोंडदेखला विरोध जरी केला असला, तरी अन्य पक्षांनी त्यावर मतप्रदर्शन केलेले नाही. त्यातच राहुल गांधींनीही युरोप दौर्‍यात ‘भाजप जे करते, त्यात हिंदू असे काहीच नाही’ म्हणत उदयनिधींच्या विधानावर प्रतिक्रिया न देता, अप्रत्यक्ष सहमतीच व्यक्त केलेली दिसते. त्यामुळे अशा सनातनविरोधी सनकींच्या या निधर्मी टोळीला देशातील हिंदू बांधव कदापि माफ करणार नाही आणि आगामी निवडणुकीत त्यांची जागा दाखवून देईल, हे निश्चित!