गणेशोत्सवाआधी कोकण रेल्वे स्थानकांचं रुपडं पालटणार: फडणवीस

 

 

 

मुंबई : गणेशोत्सव हा कोकणवासियांसाठी मोठा सण असतो. त्यामुळे गणपतीआधी कोकण रेल्वे स्थानकांचं सुशोभीकरणाचं काम करण्याचा प्रयत्न करू. गणपतीआधी हे काम होतंय ही महत्त्वाची गोष्ट आहे. अशी माहिती उपमुख्यमंत्री देवेंद्र फडणवीस यांनी दिली आहे. रायगड, रत्नागिरी आणि सिंधुदुर्ग जिल्ह्यातील कोकण रेल्वेची 12 रेल्वेस्थानकं आणि परिसराचं सुशोभीकरण आणि काँक्रीटीकरणाच्या कामांचं भूमिपूजन मुख्यमंत्री एकनाथ शिंदे यांच्या हस्ते मंगळवारी (८ ऑगस्ट) ऑनलाइन करण्यात आलं.

 

यावेळी बोलताना फडणवीस म्हणाले, "कोकण हा पर्यटकांच मन मोहून घेणारा परिसर आहे. कोकणाच्या विकासासाठी सरकारकडून समितीची स्थापना करण्यात आली आहे. कोकणची लाईफलाईन असलेली कोकण रेल्वेच्या स्थानकांचा कायापालट होणे गरजेचे आहे. आपले सार्वजनिक बांधकाम मंत्री रविंद्र चव्हाण यांनी यासाठी पुढाकार घेतला. गणपतीच्या आधी हे काम पूर्ण करण्याचा आमचा मानस आहे. गणेशोत्सव हा कोकणवासियांसाठी मोठा सण आहे. यावेळी मोठ्या प्रमाणात लोकं कोकणात जात असतात."

 

"या वर्षीच्या अर्थसंकल्पातही कोकणासाठी अनेक प्रकल्प मांडले. स्टेशन परिसरात रस्त्याचं काँक्रीटकरण, प्रकाश दिवे, पेव्हड शोल्डर, स्वच्छतागृह, स्टेशन प्लाझा, प्रतिक्षालयांचं सुशोभिकरण होणार आहे. कोकण रेल्वेच्या १२ स्टेशनच्या सुशोभिकरणासाठी ५६.२५ कोटी रुपयांची तरतूद करण्यात आली आहे." अशी माहिती फडणवीसांनी दिली.