गॅबनचा गोंधळ

एकीकडे इक्वेटोरियल गिनिया, कॅमेरून आणि कांगो या देशांच्या सीमा, तर गॅबनच्या पश्चिमेला अथांग पसरलेला अटलांटिक महासागर. गॅबन हा देश तसा तेलसमृद्ध म्हणून ओळखला जातो. या देशाच्या जीडीपीतील तेलाचा वाटा हा तब्बल ४३ टक्के असून ८१ टक्के तेलाची गॅबन निर्यातदेखील करतो. हे तपशील वाचून या देशातही सौदीप्रमाणेच श्रीमंती पाणी पिते, असे वाटणे अगदी स्वाभाविक. परंतु, दुर्देवाने या देशातील चित्र हे अगदी विपरित. या देशातील जवळपास ४० टक्के जनता बेरोजगारीच्या छायेत असून काळ्या सोन्याच्या श्रीमंतीचे लाभ हे फक्त मूठभर सत्ताधारी, सरकारमधील उच्च पदस्थ आणि काही कंपन्यांपुरतेच मर्यादित राहिले. त्यातच १९६० साली स्वातंत्र्य मिळेपर्यंत, हा देश फ्रान्सची वसाहत म्हणूनच फ्रेंचांच्या टाचेखाली होता.

फ्रान्ससह अमेरिका, रशिया व अन्य देशही गॅबनमधील परिस्थितीवर लक्ष ठेवून आहेत. पण, सध्या या देशाच्या सीमा पूर्णपणे बंद करण्यात आल्या असून, विमान वाहतूकही पूर्णपणे स्थगित करण्यात आली. खरं तर या घटनेने राजकीय घराणेशाही संपली आणि पुन्हा निवडणुका होऊन लोकशाहीचे राज्य प्रस्थापित होईल, असे वाटणे स्वाभाविक. परंतु, दुर्देव हेच की ज्या लष्करप्रमुखाने, सध्या गॅबनची धुरा आपल्या हाती घेतली आहे, तो जनरल ऑलिग्यू हा अली बांगो यांचाच चुलता. एवढेच नाही तर अली यांचे वडील ओमर  यांचा अंगरक्षक म्हणूनही ऑलिग्यू कार्यरत होता. तसेच, गॅबनच्या गुप्तचर यंत्रणेचा तो प्रमुख होता. म्हणजे पुन्हा एकदा गोंधळलेल्या गॅबनची वाटचाल ही घराणेशाहीकडून घराणेशाहीकडे, असेच खेदाने म्हणावे लागेल!