ISIS चा संशयित दहशतवादी मोहम्मद तारिकला गोरखपूरमधून अटक!

 

लखनऊ : उत्तर प्रदेश पोलिसांच्या दहशतवाद विरोधी शाखेने (ATS) गोरखपूर जिल्ह्यातून ISIS या दहशतवादी संघटनेच्या विचारसरणीच्या एका संशयित दहशतवाद्याला अटक केली आहे. दि. ६ जुलै रोजी या दहशतवाद्याला अटक केले असून मोहम्मद तारिक अथर असे त्यांचे नाव आहे. तो स्वत: कट्टरवादी असल्याचे सांगण्यात येत आहे. गुजरात एटीएसने यूपी पोलिसांना दहशतवाद्याला पकडण्यासाठी इनपुट दिले होते. चौकशीत तारिकने स्वतःला बगदादीपासून प्रभावित असल्याचे सांगितले आहे. त्याने इतर काही तरुणांनाही दहशतीचा मार्ग दाखविण्याचा प्रयत्न केला.

तारिक गोरखपूर जिल्ह्यातील खुनीपूर परिसरातील अंजुमन शाळेजवळ राहतो. उत्तर प्रदेश पोलिसांचे विशेष डीजी प्रशांत कुमार यांनी प्रसारमाध्यमांना सांगितले की, एटीएसला गुजरात पोलिसांकडून तारिकच्या संशयास्पद हालचालींबाबत माहिती मिळली. या माहितीच्या आधारे तारिकला एटीएसच्या मुख्यालयात बोलावून चौकशी करण्यात आली. चौकशीदरम्यान, आंतरराष्ट्रीय दहशतवादी संघटना ISIS च्या विचारसरणीचा त्याच्यावर खोलवर प्रभाव असल्याचे आढळून आले. तारिक अनेकदा बगदादीचे व्हिडिओ पाहत असे आणि त्याला बंदुकांची खूप आवड होती.

तारिकने एटीएसला असेही सांगितले की, त्याला मुजाहिद बनून भारतात जिहाद करायचा आहे. भारतात शरिया कायदा लागू करण्याचे आपले ध्येय त्यांनी सांगितले. तारिकने ऑनलाइन ISIS संघटनेशी निष्ठेची शपथ घेतली. तो सोशल मीडियाच्या माध्यमातून तरुणांना इसिसमध्ये सामील होण्यासाठी प्रवृत्त करत असे. त्याच्या साथीदारांना जिहादसाठी तयार करणे हा त्याचा हेतू होता. तारिकने जिहादी व्हिडिओ आणि सामग्री शेअर करण्यासाठी टेलिग्राम अॅपचा वापर केला. त्याच्याविरुद्ध 13/18/38 रोजी IPC च्या कलम 121-A/123 आणि बेकायदेशीर क्रियाकलाप प्रतिबंध कायदा, 1967 अन्वये एफआयआर नोंदवण्यात आला आहे.

एटीएसने सांगितले की, अटक करण्यात आलेला दहशतवादी ISIS प्रचारक अबू सईद अल ब्रिटानी आणि अल अदनानी यांनी लिहिलेले लेख वाचत असे. हे लेख वाचून त्यांच्यावर कट्टरतावादी विचारसरणीचा प्रभाव पडला. जिहादसाठी तो भारतातील मुस्लिम तरुणांना परदेशात नेण्याचा विचार करत होता, असेही चौकशीदरम्यान समोर आले आहे. तारिकने एटीएससमोर सर्व गुन्ह्यांची कबुली दिली आहे. एडीजी एटीएस नवीन अरोरा यांनी दिलेल्या माहितीनुसार, मुहम्मद तारिक अथरचा न्यायालयाकडून रिमांड मिळविण्यासाठी प्रयत्न केले जातील. एटीएसला त्याच्या उर्वरित नेटवर्कची चौकशी करायची होती. तारिककडून मोबाईल, एक सिमकार्ड, आधारकार्ड, रोख एक हजार रुपये जप्त करण्यात आले आहेत. त्याच्या मोबाईलमध्येही आक्षेपार्ह मजकूर आढळून आला आहे.