स्वराज्याच्या इतिहास जनतेपर्यंत पोहोचविण्यासाठी ६ महत्वपूर्ण वास्तूंची निर्मिती : मंगलप्रभात लोढा

मुंबई : छत्रपती शिवाजी महाराजांच्या शिवकालीन स्वराज्याच्या इतिहासाला वेगळ्या माध्यमातून जनतेसमोर मांडण्याचा प्रयत्न राज्य सरकारच्या वतीने करण्यात येत आहे. छत्रपती शिवाजी महाराजांच्या इतिहासाची माहिती देण्यासाठी महाराष्ट्र सरकारच्या वतीने पर्यटन विकास महामंडळाच्या माध्यमातून ६ ठिकाणी शिवसृष्टि आणि संग्रहालये उभारण्याचा निर्णय घेण्यात आला आहे. या संपूर्ण कामाला एक महिन्यात सुरुवात होणार असून कामासाठी ४१० कोटींची भरघोस तरतूद करण्यात आली आहे, अशी माहिती पर्यटन मंत्री मंगलप्रभात लोढा यांनी दिली आहे.

ते पुढे म्हणाले, महाराष्ट्रात किल्ले शिवनेरी, गोराई येतथे अतिक्रमण मुक्त करण्यात आलेली जागा, बुलढाणा, संभाजीनगर, नाशिक व रामटेक या ६ ठिकाणि शिवसृष्टीसह संग्रहालये उभारण्याचा निर्णय घेण्यात आला आहे. एक महिन्याच्या आत सुरु होणारे हे काम वर्षभरात पूर्ण होणार असल्याची शास्वती देखील लोढांनी यावेळी दिली आहे.

''राज्यातील पर्यटनाला चालना मिळावी व त्यातून रोजगार निर्मिती व्हावी, यासाठी राज्य सरकार व पर्यटन विभाग विविध उपक्रम राबवत आहे. महाराष्ट्रात येणाऱ्या प्रत्येक पर्यटकाला छत्रपती शिवाजी महाराजांचा इतिहास अनुभवायचा असतो.हेच लक्षात घेवून छत्रपती शिवरायांचा इतिहासाबाबत सर्व माहिती या शिवसृष्टीतून पर्यटन व शिवप्रेमींना मिळण्यास मदत होणार आहे.शिवसृष्टी च्या कामाबाबत जनतेच्या आलेल्या सुचनांनुसार या कामामध्ये बदल करण्यात येईल.तसेच विविध लोगो स्पर्धांचे आयोजनही करण्यात येईल. शिवनेरीवर छत्रपती शिवाजी महाराज बाल संस्कार संग्रहालय उभारण्यात येणार आहे या कामासाठी ७० कोटी रूपयांची तरतुद करण्यात आली आहे.'' असे लोढा यांनी म्हटले आहे.

गोराई (मुंबई) येथील महाराष्ट्र पर्यटन विकास महामंडळाच्या जागेवर असलेली अनधिकृत बांधकामे हटविण्यात आली असून त्या ठिकाणि भव्य संग्रहालय उभारण्यात येणार आहे. या ठिकाणी २५ एकर जागेत छत्रपती शिवाजी महाराज यांचे युद्ध कौशल्य व आरमार संदर्भात प्रेरणा देणारे संग्रहालय (वॉर म्युझियम) उभारले जाणार आहे. बुलढाणा येथे राजमाता जिजाऊ संग्रहालय,छत्रपती संभाजी नगर येथे धर्मवीर छत्रपती संभाजी महाराज संग्रहालय,नाशिक येथे छत्रपती शिवाजी महाराज राजकौशल्य संग्रहालय,रामटेक येथील छत्रपती शिवाजी महाराज हिंदवी स्वराज्य संग्रहालयासाठी प्रत्येकी ५० कोटी रूपयांची तरतुद करण्यात आली आहे. शिवसृष्टी आणि इतर वस्तूंच्या माध्यमातून महाराष्ट्रातील जनतेला राजमाता जिजाऊ, छत्रपती शिवाजी महाराज व धर्मवीर छत्रपती संभाजी महाराज यांचा तसेच महाराष्ट्राचा गौरवशाली इतिहासाची अनुभूती येईल, असा विश्वास लोढांनी व्यक्त केला आहे.

नव्या पिढीला पर्यटन स्थळांचे जतन आणि संवर्धनाचे महत्व कळावे यासाठी लवकरच प्रत्येक शाळा व महाविद्यालयात पर्यटन क्लब स्थापन करण्यात येणार असल्याची माहितीही लोढा यांनी दिली आहे. प्रत्येक शाळा व महाविद्यालयानजीक असलेल्या पर्यटन स्थळांचे जतन करावे स्थानिक ठिकाणी जास्तीत जास्त पर्यटक यावेत यासाठी पर्यटन विभागामार्फत हा उपक्रम राबविण्यात येणार असल्याचे पर्यटनमंत्री मंगलप्रभात लोढा यांनी सांगितले.

महिला व बालविकास मंत्री मंगलप्रभात लोढा म्हणाले की, २१ जुन हा जगभरात “आंतरराष्ट्रीय योग दिवस” म्हणून साजरा केला जातो. आरोग्याच्या दृष्टीने योग साधनेचे महत्व अनन्य साधारण आहे. राज्यातील सर्व सामान्य व्यक्तिपर्यंत विशेष करुन महिला वर्गामध्ये योग साधनेची गोडी वृध्दींगत व्हावी यासाठी प्रत्येक अंगणवाडी स्तरावर, अंगणवाडी क्षेत्रातील किशोरवयीन मुली, नोंदणी झालेल्या महिला (गरोदर महिला वगळून) यांचेसाठी अंगणवाडीत प्रशिक्षणाचा उपक्रम आयोजित करुन “अंतरराष्ट्रीय योग दिवस साजरा करण्यात येणार आहे.