मविआची भाऊबंदकी

कर्नाटकमधील काँग्रेसच्या विजयाने काश्मीरपासून ते कन्याकुमारीपर्यंत विरोधकांना आनंदाच्या अगदी उकळ्या फुटल्या. भाजप जसा कर्नाटकमध्ये पराभूत झाला, तशीच स्थिती आपल्या राज्यातही निर्माण व्हावी, म्हणून काहीजण देव पाण्यात ठेवून बसले आहेत. मेहबुबा मुफ्तीही अशाच भाबड्या आशेवर दिवस ढकलत आहेत. कर्नाटकप्रमाणे काश्मीरची जनताही भाजपला नाकारेल आणि आपण पुन्हा मुख्यमंत्री होऊ, असे मुफ्तींचे दिवास्वप्न. पण, जोपर्यंत राज्यात ‘कलम ३७०’ पुुन्हा लागू होत नाही, तोपर्यंत मी कोणत्याही निवडणुका लढवणार नाही, असेही त्या कर्नाटकमध्ये माध्यमांशी बोलताना सांगून मोकळ्या झाल्या आणि दुसरीकडे राज्यात निवडणुका घेण्याचा मोदी सरकारचा कोणताही मानस नसल्याचेही त्यांनी यावेळी बोलताना सांगितले. पण, सत्य हेच की, ‘कलम ३७०’ पुन्हा येणे नाही. काश्मीरमध्ये निवडणुका होतीलच. तेव्हा सध्या निवडणुकीला नकार देणार्‍या मेहबुबा मुफ्ती पुन्हा जनतेसमोर गेल्या, तरी त्या पुन्हा मुख्यमंत्रीही होणे नाहीच! मुफ्ती, अब्दुल्ला आणि गांधी घराण्याने काश्मीर खोर्‍याला कायम कसे धार्मिक संघर्षात धुमसते ठेवले आणि काश्मीरचा विकास कसा रोखून धरला, याचा इतिहास साक्षीदार आहेच. पण, आम्ही काश्मीरचे असल्यामुळे खोर्‍याचा विकास फक्त आम्हीच करू शकतो, या अविर्भावात मुफ्ती अजूनही हरवलेल्या दिसतात. पण, ‘कलम ३७०’ हटविल्यापासून काश्मीरचा चेहरामोहराच पूर्णपणे पालटला. ‘जी २०’च्या बैठकीला कालपासून काश्मीरमध्ये शुभारंभही झाला. त्यामुळे एकप्रकारे काश्मीरमध्येच ‘जी २०’ बैठकीचे आयोजन करून भारताने तेथील विकास, प्रगती जगासमोर मांडली आहे. पण, मुफ्तींनी त्याचे स्वागत करण्यापेक्षा, या बैठकीनिमित्त वाढवलेल्या सुरक्षा बंदोबस्तामुळे काश्मिरींना कसा त्रास सहन करावा लागतोय, त्याच्या तक्रारींचा पाढा वाचला. परंतु, आता मुफ्तींनी कितीही आरडाओरड केली तरी सत्य बदलणारे नाही. ‘कलम ३७०’ इतिहासजमा झाले आणि त्याबरोबर काश्मीरमधील घराणेशाहीसुद्धा निकालात निघाली. तेव्हा, मुफ्तींनी उघड्या डोळ्यांनी काश्मीरचा चौफेर विकास आता कबूल करावा. मुफ्तींनीही मोठ्या मनाने जेव्हा कधी काश्मीरमध्ये निवडणुका होतील, तेव्हा जरुर मैदानात उतरावे आणि काश्मिरी त्यांना संधी देतात की नाकारतात, ते पाहावे!