‘पीएफआय’मुळे पुणे रडारवर

राष्ट्रीय तपास यंत्रणेने (एनआयए) दोन दिवसांपूर्वी पुण्यातील कोंढवा परिसरातील ‘ब्लू बेल’ या शाळेचे दोन मजले ‘सील’ केले. याठिकाणी दहशतवादी कारवायांकरिता सशस्त्र आणि नि:शस्त्र लढा कसा लढावा, याचे प्रशिक्षण ‘पॉप्युलर फ्रंट ऑफ इंडिया’कडून दिले जात होते, असा दावा ‘एनआयए’कडून करण्यात आला आहे. त्यामुळे दहशतवादी कारवायांसाठी शाळेचा वापर केला जाणे अत्यंत धक्कादायक आहे. स्थानिक पोलीस यंत्रणा आणि त्यांचे खबर्‍यांचे जाळे अधिक घट्ट करण्याची वेळ आलेली आहे. पुणे हे कायमच दहशतवाद्यांच्या हिटलिस्टवर राहिलेले आहे. यापूर्वीदेखील ‘इंडियन मुजाहिद्दीन’ने पुण्यात आपले ‘मोड्यूल’ सक्रिय केलेले होते. आजही अर्धा डझन पुणेकर धर्मांध तरुण पाकिस्तान आणि आखाती देशात राहून आपले नेटवर्क चालवित असल्याचे यंत्रणांचे म्हणणे आहे. दहशतवाद्यांनी दि. १३ फेब्रुवारी, २०१० रोजी पुण्यातील जर्मन बेकरीमध्ये ‘इंडियन मुजाहिद्दीन’ने बॉम्बस्फोट घडवला होता. या घटनेत एकूण १८ जणांना आपले प्राण गमवावे लागले होते. यामध्ये भारतीयांसह सुदान, इटली, नेपाळ, इराणच्या नागरिकांचाही समावेश होता. कोंढव्यातील अशोका म्यूज सोसायटीमधून चालणारे ‘आयएम’चे मोड्यूल महाराष्ट्र ‘एटीएस’ने उघडकीस आणले होते. दि. १ ऑगस्ट, २०१२ रोजी जंगली महाराज रस्त्यावर सलग पाच ठिकाणी बॉम्बस्फोट घडविण्यात आले. ‘सिमी’च्या मध्य प्रदेशातील दहशतवाद्यांनी दि. ११ जुलै, २०१४ रोजी थेट फरासखाना पोलीस ठाण्यात बॉम्बस्फोट घडवत यंत्रणांना आव्हान दिले होते. परंतु, २०१४ साली राज्य आणि केंद्रात सरकार बदलल्यानंतर आजवर कोणत्याही मोठ्या दहशतवादी कारवाया झालेल्या नाहीत. सतर्क यंत्रणांमुळे ‘पीएफआय’चा निर्माण होऊ घातलेला तळ उद्ध्वस्त झाला आहे. ‘पीएफआय’च्या देशविघातक आणि विखारी कारवायांसाठी तरुणांची भरती करण्यापासून ते आर्थिक रसद निर्माण करण्यासाठी काम करणार्‍यांना पुण्यामधून अटकदेखील करण्यात आलेली आहे. मुख्यत्वे ही कारवाई कोंढवा परिसरातच पुन्हा करण्यात आलेली आहे. ‘पीएफआय’वरील पुण्याच्या कारवाईच्या निमित्ताने सुरक्षेचा मुद्दा ऐरणीवर आला आहे. सतर्क यंत्रणा आणि मजबूत सरकार यामुळे संभाव्य घटना टळल्या आहेत. परंतु, सर्वसामान्य नागरिकांनी किती सतर्क राहणे आवश्यक आहे.