सावरकरांविरोधात एक शब्दही सहन करणार नाही

मुंबई : स्वातंत्र्यवीर सावरकरांविरोधात यापुढे एक शब्दही सहन करणार नाही. स्वातंत्र्यवीर सावरकरांचा अपमान खपवून घेणार नाही, असा इशारा मुख्यमंत्री एकनाथ शिंदे यांनी दिला आहे. भाजप आणि शिवसेना यांच्यावतीने रविवारी मुंबई आणि ठाण्यात आयोजित सावरकर गौरव यात्रेत ते बोलेत होते.मुख्यमंत्री एकनाथ शिंदे म्हणाले की, सावरकरांचा वारंवार अवमान करणार्‍यांना सावरकर गौरव यात्रेतून सडेतोड प्रत्युत्तर दिले जात आहे. सावरकर गौरव यात्रा ही तर केवळ एक छोटीशी झलक आहे. यापुढे आम्ही सावरकरांचा अवमान सहन करणार नाही. सावरकरांवर बोलताना नेत्यांनी विचारपूर्वक बोलले पाहीजे. सावरकरांच्या गौरव यात्रेतून त्यांचे ज्वलंत हिंदुत्वाचे विचार घरोघरी पोहोचवण्याचा प्रयत्न करणार असल्याचेही ते म्हणाले.

दादरमध्येही सावरकर गौरव यात्रा काढण्यात आली. भाजप नेते आशिष शेलार या यात्रेत सहभागी झाले होते. यावेळी आशिष शेलार म्हणाले की, राहुल गांधींनी सावरकरांविरोधात जे वक्तव्य केले आहे, त्याबद्दल त्यांनी माफी मागावी, अशी आमची मागणी आहे. उद्धव ठाकरेंनी राहुल गांधींना माफी मागायला लावावी.दादरमधील भाजप व शिवसेनेच्या या यात्रेत शेकडो नागरिक सहभागी झाले होते. विद्यार्थिनीही पारंपारिक वेशभूषेत या यात्रेत सहभागी झाल्या होत्या.