ही फसगत नेहमीचीच!

अजित पवार हे आपल्या नेहमीच फसणार्‍या बंडांमुळे सातत्याने चर्चेत असतात. दर दोन-तीन वर्षांनी नाराजीच्या चर्चा घडवून आणायच्या, आमदार एकत्र करून बंड करत असल्याच्या बातम्या स्वतःच पेरायच्या आणि अखेरीस काका शरद पवारांनी सुनावल्यावर सपशेल माघार घ्यायची, हा शिरस्ता अजित पवार गेली अनेक वर्षे पाळत आहेत. अजित पवारांनी आजवर केलेल्या बंडाचा विचार करता उच्च पदाची महत्त्वाकांक्षा आणि पक्षावर एकहाती पकड करण्याची सुप्त इच्छा या दोन बाबी बंडामागे दिसतात. मात्र, त्यापलीकडेही सुप्रिया सुळेंच्या हाती पक्षाची धुरा जाऊ नये आणि काकांनंतर बहिणीच्या हाताखाली काम करायला लागू नये, ही त्या मागील खरी कारणे आहेत. अजितदादांनी केलेली बंड फसली. कारण, राष्ट्रवादी काँग्रेसवर आजही शरद पवारांच्या एकहाती आणि भक्कम नेतृत्वाचे गारुड कायम आहे. पक्षाची स्थापना होऊन २४ वर्षे उलटून गेली तरी आजही पवार हेच पक्षाचे अध्यक्ष आहेत. त्यामुळे पवारांचा तळागाळातील कार्यकर्त्यांशी आजही ‘कनेक्ट’ कायम आहे. स्थानिक पातळीवरील कार्यकर्त्यांशी आणि गावकर्‍यांशी असलेला थेट संपर्क, स्थानिक प्रश्नांची जाण असल्याने शरद पवारांविषयी आमदारांमध्ये एक आपुलकीची भावना आहे. कुठलीही गोष्ट ‘लॉजिकल एंड’वर संपवण्याचा शरद पवारांचा गुण अजित पवारांमध्ये नाही, हेच अजितदादांच्या फसगतीचे मुख्य कारण. बंड केल्यानंतर आपण ही कृती करण्यामागे नेमकी कारणे काय आणि बंडानंतर आपल्या समर्थक आमदारांचे काय करणार, याबाबत स्पष्टता करण्यात अजितदादा कमी पडतात आणि त्यामुळे दादांची बंड फसतात, असे स्वतः राष्ट्रवादीचे आमदार खासगीत बोलतात. मुळातच अजितदादांच्या बाबतीत प्रतिमारंजन करून त्यांना वास्तवापेक्षा अधिक मोठे दाखवण्यात आले. त्यातच अजितदादांच्या भाटांनी ‘दादा म्हणजेच राष्ट्रवादी काँग्रेस’ असे भासवण्याचा प्रयत्न केला. पण, दिल्लीत राहूनही शरद पवारांनी पक्षावरील आपली मजबूत पकड सैल होऊ दिलेली नाही, ज्याचा प्रत्यय २०१९ साली झालेल्या आणि परवा फसलेल्या बंडानंतर पुन्हा दिसून आला. अजितदादांची धरसोड वृत्ती, एकीकडे कुटुंब आणि दुसरीकडे राजकीय अस्तित्व हा पेच, भाजपत जायचं की नाही यावरून निर्माण झालेला संभ्रम आणि पक्षांतर्गत निर्माण झालेली कोंडी, या सगळ्या धुमश्चक्रीत गोंधळलेल्या अजितदादांची कायम फसगतच झाली, जी त्यांच्या आक्रमक राजकीय नेतृत्व या प्रतिमेला तडा देऊन गेली!