ठाकरेंना काँग्रेसचाच टेकू!

लोकसभा निवडणुकांसाठी आता अवघे काही महिने शिल्लक राहिले असताना, साहजिकच जागावाटप हा युती-आघाड्यांसाठी अत्यंत कळीचा मुद्दा. त्यावरुन मग दावे-प्रतिदावे करुन आपली निवडणूक सज्जता दाखवून बेटकुळी फुगवण्याचा प्रयत्न केला जातो. उद्देश एवढाच की, आपले शत्रू असो वा मित्रपक्ष, दोघे काहीसे दबावात येतील आणि मग आपली ‘बारगेनिंग पॉवर’ वाढेल. महाविकास आघाडीतही सध्या जागावाटपावरुन असेच रणकंदन सुरु झालेले दिसते. ठाकरे गटाचे खासदार आणि विश्वप्रवक्ते संजय राऊत यांनी महाराष्ट्रातील ४८ पैकी २३, म्हणजेच जवळपास निम्म्या जागा लढविणार असल्याचा दावा केला. आता म्हणा राऊतांनी असे अव्वाच्या सव्वा दावे करणे मुळीच नवीन नाही. पण, आता ज्यांचा पक्षच निम्म्याहून कमींच्या खांद्यावर कसाबसा तग धरुन आहे, त्यांनी राज्यातील निम्म्या लोकसभेच्या जागांवर दावा करणे, हेच मुळी हास्यास्पद. त्यातच ठाकरे आणि पवार अशी राज्यातील प्रभावशाली समजणार्‍या राजकीय घराण्यांच्या पक्षालाच फुटीचे ग्रहण लागल्याने, आपसूकच काँग्रेसचे पारडे राज्यातही जड झालेले दिसते. त्यामुळे ठाकरे, पवार आधी ज्याप्रमाणे काँग्रेसला दुय्यम लेखून नुसते फरफटत होते, तशी परिस्थिती आता निश्चितच नाही. पण, विश्वप्रवक्त्यांना समजावणार तरी कोण म्हणा? साहेब सांगे, प्रवक्ता बोले, अशीच त्यांची गत. साहेबांच्याच मनातलं ओठांवर आणणारे, हे असे हाडाचे विश्वप्रवक्ते.... आता यावर राज्यातील काँग्रेसचे नेते आणि राज्याचे विधानसभेतील विरोधी पक्षनेते विजय वड्डेटीवार यांना प्रतिक्रिया विचारली असता, “हायकमांड निर्णय घेईल,” असे सांगून त्यांनीही याकडे फारसे गांभीर्याने लक्ष दिलेले नाही. यावरुनच राऊतांना आणि पर्यायाने ठाकरेंना काँग्रेस किती किंमत देते, याची केवळ कल्पना यावी. त्यातच संजय राऊतांनी “आमचे सगळे दिल्लीत ठरले. राज्यातील काँग्रेस नेत्यांना याची कल्पना नसावी,” असे म्हणत मविआतील विसंवाद आणि असमन्वयच चव्हाट्यावर आणला. यावरुन राऊतांचा राज्यातील काँग्रेस नेत्यांना कमी लेखण्याचा, त्यांना अनुल्लेखाने संपवण्याचा प्रयत्न आगामी काळात अंगलट आल्याशिवाय राहणार नाही. कारण, शेवटी हायकमांड दिल्लीवरुन निर्णय घेणारी असली, तरी महाराष्ट्रात काँग्रेसच्या टेकूशिवाय ठाकरेंना पर्याय नाही, हीच सत्यस्थिती.